Атна карлы яңгыр белән башланып китте, бу берничә көн өчен дә 10 миллиметр калынлыгы кар яуган, Ноябрь аенда Татарстанда айлык норма булып 45 мм явым-төшем санала. Юлларны кардан чистарту өчен барлыгы 200 дән артык берәмлек техника һәм 500гә якын эшче җәлеп ителгән.
Бу көннәрдә урамда көрәк тотып кар җыештыручылар саны аеруча күп, беренче чиратта алар техника керә алмый торган җирдә эшли. Мондый һава торышы юл- транспорт халәкәтләренең артуына китергән. Шул сәбәпле бу көннәрдә аеруча машина йөртүчеләргә хәрәкәт күп булган урыннарда, мәктәпләр янында, юл чатында куркынычсызлык тәэмин итәрлек тизлек белән хәрәкәт итәргә киңәш ителә.
Татарстанда шторм кисәтүе игълан ителде: бүген көндез һәм кич республика территориясендә буран һәм көчле җил булуы көтелә. Көндез урыны белән көчле кар булырга мөмкин, 12 сәгать эчендә ким дигәндә 20 мм явым-төшем фаразлана. Кайбер районнарда синоптиклар җепшек кар һәм бозлы яңгыр вәгъдә итә.
Динә Нәҗметдинова, Ренат Сәхипгәрәев, Татарстан Яңалыклары
