Битлегең юк икән — штраф түлә. «Казан – Албаба» шәһәр яны электр поездында һәм Юдино шәһәр яны вокзалында масштаблы рейд узды. Транспорт полициясе вәкилләре, вокзал хезмәткәрләре белән бергә, барлык пассажирларның да шәхси саклану чаралары бармы – юкмы икәнлеген тикшерде. Рейдка хәбәрчебез дә кушылды.
Электричкага кергәндә үк тикшерүчеләр каршылыкка юлыкты. Керү юлында басып торган ике ир-атның куркып калу билгеләре йөзләренә чыкты.
Хәзер Казанда битлек режимын үтәү буенча рейдлар көчәйтелде. Инспекторлар кешеләрнең җаваплырак булуын билгеләп үтә. Электричкада барысы да диярлек битлекләрдән.
Киябез, хәзер битлек кимәскә ярамый. Бу бит безнең сәламәтлек өчен кирәк. Без олы яшьтә, үзеңне сакларга кирәк.
пандемия башлануга битлек киеп йөрим. Мин үзем тимер юл системасында эшлим, битлекне эштән бирәләр. Сакланам.
«Содружество» пассажирлар йөртү хезмәтенең бүлек җитәкчесе Николай Еремцов: «пассажир битлексез булса, безнең хезмәткәрләр, беренче чиратта, аларны киюләрен сорыйлар. Әгәр баш тартсалар яки битлекләр юк икән, аларга поезд яки вокзалларда кассирлардан сатып алырга тәкъдим итәләр. Баш тартсалар, безнең хезмәткәрләр хокук саклау органнарына мөрәҗәгать итәләр.»
Хәзер тәртип бозучылар азайды, ди транспорт полициясе хезмәткәрләре. Аерым кешеләр очрый әле. Октябрь аенда җиде беркетмә төзелгән.
Вокзалга кергәндә һәр өченче кеше шундый киңәшләр алды. Бина даими дезинфекцияләнә, социаль дистанция саклана.
Казанның пассажирларга хезмәт күрсәтүүзәге белгече Людмила Федушкина: «кешеләр хәзер барысын да яхшы белә. Җәмәгать урыннарында шәхси саклану чараларыннан файдаланырга кирәклеген һәркем исендә тота.»
Ай ахырына кадәр республиканың Юдино, Буа, Зөя, Арча шәһәр яны вокзалларында рейдлар үткәрергә планлаштыралар. Битлек режимын бозучыларга 1 мең сум штраф салына.
Ралина Абрамова, Ренат Сәхибгәрәев, Татарстан яңалыклары.
