Казанда соңгы елларда гына да күп балалы гаиләләр саны 14 меңнән артып киткән. Моны белгечләр республикада күп балалы гаиләләр өчен каралган махсус программалар булу белән аңлата. Әмма, ни кызганыч, гаиләдә сламәтлеге чикле балалар туу да елдан-ел арта. Чагыштыру өчен 2015 елда республика күләмендә 14 мең ярым булса, хәзер — 16 мең тирәсе. Бу саннар артында кешеләр, гаилә язмышы. Нәкъ менә шундый четрекле язмышлы һәм күп балалы гаиләләргә Татарстанда һәрвакыт ярдәмгә әзер оешмалар бар. Шуларның берсе — «Наз» фонды, 30 елдан артык ярдәмгә мохтаҗ гаиләләр өчен төрле чаралар үткәрә.
Бу юлы «Наз» фонды кунаклары-Теләче һәм Кайбыч районы әниләре. Кәрим Тинчурин театры белән берлектә күпбалалы һәм мөмкинлекләре чикле балалар тәрбияләүчеләргә бәйрәм оештырган. Үзара аралашып, киңәш-табыш итеп алган әниләргә бушлай спектакль карау мөмкинлегеннән тыш, бәйрәм бүләкләре дә тапшырылды. Әлеге изге гамәлне Нурания ханым хәләл җефете Әсхәт белән башкара. Кунаклар үзләренә дә Теләче районыннан килгән сувенир бүләк иттеләр. «Безнең язмышларга битараф булмаган, яхшы кешеләр бар ул», — дип оештыручыларга чиксез рәхмәтләрен җиткерде очрашуга килгән әниләр.
Мөршидә Җиһан, Таһир Хәсәнов. Татарстан яңалыклары.
