«Милләтнең гореф-гадәтләрен, холкын, хәтта яшәеш үзенчәлекләрен бию аша таныту – зур талант!» — дип әйткән бер акыл иясе. Андый талантлар бездә бар һәм Татарстанда бию сәнгате үсештә дип горурланып әйтә алабыз. Нигезе дә нык. Быел Казан дәүләт мәдәният институтының хореография сәнгате кафедрасы ачылуга 50 ел! Тулырак Айзилә Батырханова әзерләгән язмада.
Казан дәүләт мәдәният институтының 1993 елгы чыгарылыш студентларын матур бәйрәм кабат очраштырды. Йөзләрдә елмаю, күңелләрдә шатлык!
1972 елда Казан мәдәният институты югары белемле биючеләрне әзерләүгә керешә. Бу чын тарихи вакыйга була. Хореография сәнгате кафедрасының башында РСФСР һәм Татарстанның халык артисты, балерина Нинель Юлтыеваның исеме алтын хәрефләр белән язылган. Нәкъ менә аның җиңел аягы белән мәдәният институты профессонал биючеләрне әзерли башлый.
Дөньяның кайсы читенә генә бармасыннар, Татарстан биючеләрен әллә кайдан танып алалар! Горурлыгыбыз, Йөзек кашы булган Татарстан дәүләт җыр һәм бию ансамбле биючеләренең яртысыннан күбрәге — мәдәният институтының хореорграфия кафедрасы студентлары. Шәп кадрлар өчен Рәхмәт сезгә дип баш иде, үзе дә әлеге югары уку йортын тәмамлаган — дәүләт җыр һәм бию ансамбленең сәнгать җитәкчесе Айрат Хаметов!
Мин бик бәхетле. Мин биредә укыдым һәм үзем дә укыттым. Мине иң куандырганы шул – бию һөнәренә очраклы кешеләр килми. Кечкенәдән үк үз өстеңдә эшләү, хәрәкәтләнү, бию түгәрәкләренә йөрү алга таба аларны төз гәүдәле биючеләр итә! Безнең югары уку йортында теоретик белем дә, практик белем дә, методик белем дә, иҗат та бергә кушыла.
Юбилей концертында котлаулар, теләк әйтүләр бик күп булды. Төрле елларда белем биргән укытучыларны да алкышлап искә алдылар. Милли хеорография сәнгатенә зур өлеш керткән, уникаль китаплар бастырган Гай Хаҗиевич Таһировны аерым бер җылылык белән искә алдылар.
Бүгенге көндә хореография сәнгате кафедрасы традицион укыту ысулларын һәм яңа белем бирү технологияләрен берләштереп, Татарстаннан гына түгел, Россия төбәкләреннән, чит илләрдән дә студентларны кабул итә. Һәр педагог укыту процессын камилләштерүгә һәм кафедраны үстерүгә үз өлешен кертә.
Айзилә Батырханова, Ирек Хәмидуллин, Татарстан яңалыклары.
