Татарстанда туган телләр һәм Халыклар бердәмлеге елында республикада яшәүче барлык милләтләр мәнфәгатьләре турында кайгыртучанлык күрсәтелә.
Менделеев районына сәфәр вакытында моңа вице-премьер Васил Шәйхразиев җитәкчелегендәге эшче төркем дә инанды. Гореф –гадәтләрне, традицияләрне саклау, үстерү белән кызыксындылар. Муниципалитетлар вәкилләре Татарстан Президенты тарафыннан куелган бурычларны бергәләп хәл итү турында фикер алышты.
Менделеев районы күпмилләтле. Берничә гасыр дәвамында биредә татарлар, удмуртлар, марилар, руслар дус булып, үзара аңлашып яши. Һәр милләтнең теле, гореф-гадәтләре, үз йөзе буыннардан-буыннарга күчеп саклана.
Енабердино авылында удмурт мәдәниятенә кадер-хөрмәт зур. Борынгы җырлар, халык авыз иҗаты үрнәкләре, гореф-гадәтләр саклана. Ә күрше Илнәт авылына 16 нчы гасырда ук мари халкы ата-бабалары килеп урнашкан. Авыл җирлегенең бай тарихы бар. Ул-беренче мари шагыйре Микайның туган җире. Җирле мәктәп аның исеме белән аталган. Вице-премьер Васил Шәйхрәзиев уку йортында мари телендәге дәреслекләрнең искергән булуын билгеләп үтте. Мәктәпләрне туган телдә китаплар, дәреслекләр белән тәэмин итү мөһим. Моның өчен милли республикалар белән бергәләп эшләргә кирәк. Җаваплылык мәгариф һәм фән министрлыгына төшә.
Милли республикалар бу мәсьәләне үзләре хәл итә алмаса, республикадагы шушы милләтләр вәкилләре зыян күрергә тиеш түгел. Без үзебезнең бюджеттан чыганаклар табып, аларны кирәкле кулланмалар белән тәэмин итәргә тиеш.
Семяковларның күп балалы гаиләсе чынлап та мари халкының традицияләрен дәвам итү мөмкинлегенә ия булу белән горурлана ала. Әниләре Татьяна Николаевна хезмәт эшчәнлеген авыл китапханәчесе буларак башлый. Фольклор ансамбленә йөри, район, республика конкурсларында җиңүче. Семяковлар гаиләсенең активлыгы аңлашыла да – тарихи Ватаннан еракта яшәгәндә милли традицияләрне, мәдәниятне, телне саклап калу зарур.
Традицияләрне саклап яшь буынга җиткерү юнәлешләре турында түгәрәк өстәл янында ачыктан-ачык сөйләштеләр. Менделеев, Алабуга, Әгерҗе, Мамадыш районнары башкарма комитетлары вәкилләре мәктәпләрдә, мәдәният учреждениеләрендә туган телләр һәм Халыклар бердәмлеге елындагы акцияләр, чараларның үзенчәлекләренә тукталдылар. Вице-премьерның районнар вәкилләренә сораулары да аз булмады. Төрле милләт балаларына үз туган телләрен җентекләп өйрәнү өчен мөмкинлекләр булдырырга, Идел буе республикалары белән турыдан-туры элемтә урнаштырып, яңа дәреслекләр, методик кулланмалар кайтарырга кирәк. Мәдәният, мәгариф министрлыкларына, Татарстан халыклары Ассамблеясе вәкилләренә йөкләмәләр бирелде. Киләчәкне исәптә тотып, барлык милләт вәкилләренә дә уңайлы шартлар тудырылырга тиеш.
