Республикабыз укучыларының чыгарылыш бәйрәмнәре уза. Шундый тантаналы чараларның берсе Буа шәһәрендә дә булды. Биредә медальгә лаек булган чыгарылыш сыйныф укучыларын хөрмәтләделәр. Барлыгы 32 укучы яхшы нәтиҗәләр күрсәткән өчен медальләр алды.
«Бик яхшы укуы өчен» медале — ул безнең уртак уңышыбыз,- дип саный, Айсылу Шәрәфетдинова. Ул Аксу урта мәктәбен тәмамлаган. Ел аеруча катлаулы булуга карамастан, Айсылу уку елын бары бишле билгеләренә генә төгәлләгән.
Айсылу Шәрәфетдинова, чыгарылыш сыйныф укучысы: “Мин бүгенге бәйрәмгә килгәнем белән бик горурланам. Медаль алуыма, иң беренче чиратта, укытучыларыбыз, әти-әниләр һәм үземнең тырышлык белән ирештем. Бу бәйрәмгә килүемә мин бик шат”
Әлфия Шәрәфетдинова, чыгарылыш сыйныф укусының әнисе: “Бүгенге бәйрәмгә бик шатланып, теләп килдек. Чөнки кызым 11нче сыйныфны бетереп, медаль алды һәм Республика олимпиадасында катнашып диплом белән бүләкләнде. Бәйрәмне оештыручыларга олы рәхмәтебезне белдерәбез”
Район буенча 32 уку алдынгысы медальгә лаек булды. Моннан тыш, бу көнне республика һәм Бөтенроссия олимпиадаларында җиңүчеләрне дә, призерларны да котладылар.
Район җитәкчесе Ранис Камәртдинов чыгарылыш сыйныф укучыларын әлеге күркәм бәйрәм белән тәбрикләде һәм аларга үзләре теләгән уку йортларында белем алып, республика һәм илебез өчен файдалы белгечләр булып хезмәт итүләрен теләде.
Бәйрәмдә шулай ук чыгарылыш сыйныф укучыларының әти-әниләре, мәктәп җитәкчеләре һәм укытучылар катнашты.
Алсу Сәмигуллина Айрат Насруллов Татарстан Яңалыклары.
