Казан дәүләт мәдәният институтында, «Театр атнасы» дип исемләнгән иҗади проект башланды. Ачылышта Галиасгар Камал театры, Әлмәттән “Легкие крылья” урам театры аритстлары чыгыш ясады. Ачылыш тантанасыннан- Динә Нәҗмединова язмасы.
Театр яктылыкка, нурга илтә,
Кире юлга җибәрми, уңга илтә … дип язган бөек татар шагыйре Габдулла Тукай. Театр — серле бер дөнья булып тора. Ул адәм баласын уйланырга, шатланырга, хис — кичерешләре белән уртаклашырга өйрәтә. “Театр атналыгы” проектына 3 ел элек нигез салына.
Быелгы “Театр атналыгы” программасы тагын да кызыклы һәм тирән эчтәлекле. Бер атна дәвамында Проект кысаларында иститутта режиссерлык, актерлык осталыгы, сәхнә теле һәм сәхнә хәрәкәте буенча мастер-класслар үткәрү планлаштырыла. Шулай ук институтның концертлар залында Галиасгар Камал, Әлмәт, Буа дәүләт театрларының спектакләре дә тәкъдим ителә. Ачылу тантанасында “Шарм” мода театры өр-яңа кием коллекциясен тәкъдим итү һәм тәҗрибә туплау нияте белән катнашты.
Быелгы “Театр атналыгы” барыбызга да таныш булган “Шекспир” спектакле белән башланып китте һәм башка җырлы-бию тамаша белән үрелеп барды. Шулай ук чарада чакырулы кунаклар да бар иде.
Ачылу тантанасында Әлмәттән “Легкие крылья” урам театры тамашачыларны битараф калдырмады, аеруча әлеге тамаша 80 нче мәктәп укучыларына бик ошады.
Театр артисты исеменә лаек булыр өчен – хезмәтне яратырга, бик күп укырга, профессиональ яктан гел үсештә булу кирәк. Театр атналыгы да ел саен үзгәреп, яңа төсмерләр белән баетылып тора.
Мәгълүм булганча, 27 нче март көнне Театр көне, әлеге бәйрәм көнендә “Театр атналыгына” нәтиҗәләр ясалачак. Катнашучыларга төрле номинацияләрендә грамоталар һәм дипломнар тапшыру күздә тотыла. Чара кичке сәгать 4 башлана.
Динә Нәҗметдинова, Ирек Хәмидуллин.
