Баулы районы төзелүгә 90 ел. Башкортстан республикасы, Самара һәм Оренбург өлкәләре белән чиктәш булган муниципалитет республиканың чын визит карточкасына әйләнде. Хәзер Баулыда республика президенты программаларын актив тормышка ашыралар. Шуларның берсе — «Безнең ишегалды» программасы. Ел ахырына кадәр шәһәрдә барлыгы 16 ишегалдына капиталь ремонтланачак.
Энгельс урамындагы әлеге йортлар ярты гасыр элек төзелгән. Коммуникацияләр, урамдагы яктырткычлар искергән, тиешле парковка урыннары, эскәмияләр булмаган. Хәзер ишегаллары күзгә күренеп үзгәрә. Нәни балаларга уйнау өчен мәйданчык әзер инде.
Президентның «Безнең ишегалды» программасы буенча юлларга асфальт җәелә, яңа тротуарлар ясала, яктырткычлар куела. Күпфатирлы йортларда яшәүчеләр өчен шулай ук балалар өчен уен комплекслары һәм каты коммуналь калдыклары контейнерларын урнаштыру мөһим. Боларның барысы турында да алдан халыктан тәкьдимнәр җыйганнар. Хәзер эшнең иң кызу вакыты.
Энгельс урамындагы ишегалдында эшләрнең гомуми бәясе 6 миллион сумнан артык. Шулай ук Татарстан Президенты Рөстәм Миңнеханов инициативасы белән оештырылган «Безнең ишегалды» программасы буенча шәһәрдә тагын 15 территория үзгәрә.
Ишегалларыннан тыш, шәһәрдә балалар бакчалары, мәктәпләр һәм юллар капиталь ремонтлана. Иң яраткан ял итү урыннарының берсе — Җиңү һәм Хезмәт даны паркы. Ул 50 нче елларда ачылган. Җиңүнең 30 еллыгына биредә Мәңгелек ут кабына, ә 10 елдан соң Советлар Союзы Геройлары бюстлары куела. Хәзер биредә дә зур реконструкция бара. Хәрби техниканың төрле төрләреннән тыш, паркта лекторий, мастер-класслар өчен зоналар, шулай ук ял итү урыннары да булачак.
Шәһәрләрен заманча Европа провинцияләре белән чагыштырып. Татарстан яшәү өчен иң яхшы урынга әверелә, ди Баулы халкы. Болар барысы да үз вакытында Рөстәм Миңнеханов инициативасы белән хупланган программалар һәм проектлар нәтиҗәсендә мөмкин булды. Җирле халык яңартылган объектларны, скверларны, паркларны һәм ишегалларын Шәһәр көнен бәйрәм иткәндә, берничә атнадан соң бәяли алачак.
Дмитрий Второв, Ленар Хәбибуллин, Илдар Сафиуллин.
