Чувашия Республикасының Ядрин шәһәрендә «Тылда батырлык» дигән төбәкара патриотик марафон башланды. Ул Сурск һәм Казан оборона чикләре төзелеше тәмамлануның 80 еллыгына багышлана.
Бер ай дәвамында Чувашия һәм Татарстан территориясендә искә алу чаралары үткәрелә. Марафон 4 майда Казанда бәйрәм концерты белән тәмамлана.
Аклы-каралы фотосурәтләрдә чын каһарманнар язмышлары. Бу аларның Бөек Ватан сугышы елларындагы батырлык фронты иде. Хатын-кызлар, өлкәннәр, балалар, 41 нче елның зәмһәрир салкыннарында оборона чиген төзегәннәр, окоплар казыганнар. Күчмә күргәзмә экспонатлары шәхси архивлардан, Татарстан, Чувашия, башка төбәкләр Милли музейларыннан алынган.
2021 ел Чувашиядә Сурск һәм Казан оборона чикләрен төзүчеләрнең батырлыгына багышланган иде. Масштаблы мәдәни чаралар ике республикада да уза. Чувашиянең байтак районнарында мемориаллар барлыкка килде — киләсе җәйдә иң зурысын Козловка районында ачу күздә тотыла. 80 ел элек Ватанны саклау бер территориядә яшәүче барлык халыкларның уртак эшенә әверелде. Яңа гасырда да дуслык элемтәләре какшамады – каһарманнарның нәселен дәвам итүчеләр ата-бабаларын хөрмәтлиләр, уртак Россияне бергәләп төзиләр. Марафон ачылышында Татарстанның камера хоры берничә телдә җырлар башкарды.
Төбәкара марафон картасында ике республикадан дүртәр район теркәлгән. Финал концерты 4 майда Казанда Татар дәүләт филармониясе сәхнәсендә уза.
Чувашия Республикасыннан яңалыклар өчен Светлана Позднякова, Елена Дмитриева, Михаил Солин.
