Бу атнада, 19 августта, Балык Бистәсендәге Үзәк мәйданда I республика «Бистә шәле» хатын-кыз һөнәрчелеге фестивале узачак.
Бәйрәмнең программасы күп кенә кызыклы тематик чараларны күздә тота. Оста куллар ярминкәсе, «Иң креатив шәл», «Шәлне иң тиз бәйләүче» бәйгеләре – әнә шундыйлардан. Фестивальдә шулай ук мастер-класслар, презентацияләр дә узачак. Моннан тыш, фотозона, музей зонасы, «БалаЧак» балалар уен мәйданчыгы эшләячәк. Болар хакында Балык Бистәсе муниципаль районы Башкарма комитеты мәдәният бүлеге җитәкчесе Лилия Кәримуллина сөйләде.
