Балалар да, балыкчылар да инде боз өстендә. Берничә яшүсмернең юка боз өстендә йөрүен видеоязмага төшереп алганнар. Хәер, инде акыл кергән өлкәннәр дә алардан калышмый. Боз әле юка, аның өстендә йөргәндә суга бату куркынычы саклана. Коткаручылар үткәргән рейд нәтиҗәләре нинди?
Ашыкмый гына әле ныгымаган боз өстендә йөргән яшүсмерләзр ни турында уйлый икән? Шул рәвешле буш вакытны үткәрәләрме, әллә үзләренең яки интернетта утыручыларның ныклыгын тикшерәләрме?
Елга-күлләрдә әле боз әле берничә көн элек кенә ката башлады. Ә ныгып җитмәгән боз өстендә иркенләп йөрүчеләр очрый инде. Шуңа күрә республика сулыклары янында ашыгыч рәвештә коткару постларын булдыру турындагы карарга киленде.
Тәүлек буе ярдан да, судан да сулыкларны күзәтүдә тоталар. Тәҗрибәле коткаручылар да бозга керер алдыннан, аның калынлыгын үлчи.
Бу урында бозның калынлыгы тиешле нормага якын. Шулай да ул боз астыннан балык тотарга яратучылар өчен хәвефле булырга мөмкин. Рейд барышында балыкчыларны да очраттылар.
Әмерне тыңламаучылар да бар. Андый ваемсызларга административ штраф салына.
ТР кече көймәләр буенча баш дәүләт инспекторы Юрий Венедиктов: «Хәзер республика территориясендге сулыкларда иң куркыныч вакыт. Боз ныгымаган, тиешле калынлыктагы боз да ярылып китәргә мөмкин.»
Боз буйлап һава мендәре ярдәмендә генә йөрергә була. Анда да коткаручылар озатып йөргәндә генә.
Кече суднолар дәүләт идарәсенең Лаеш участогы җитәкчесе Пыренков: «ата — аналар, педагоглар балаларны бозга керүдән кисәтеп, саклап торсыннар иде.»
Киләсе кояшлы, чагыштырмача җылы көннәр әле бозга ныгырга ирек бирмәячәк. Үзеңә артык ышанып, боз өстенә кермәвең хәерлерәк.
Айнур Вәлиәхмәтов, Сергей Павлухин, Татарстан яңалыклары.
