Хезмәт һәм социаль яклау министрлыгы ел ахырына кадәр өч яшьтән җиде яшькә кадәрге балаларга, шулай ук сигез яшьтән 17 яшькә кадәрге балалары булган ялгыз ата-аналарга пособие билгеләү кагыйдәләрен үзгәртә.
Пособие мохтаҗлыкка комплекслы бәя бирүне, гаилә әгъзаларының хезмәт хакы, стипендия, эшкуарлыктан кергән табыш, пенсия булуын исәпкә алып билгеләнә. Исегезгә төшерәбез, өч яшьтән җиде яшькә кадәрге балаларга айлык түләүләрне 2020 елда Россия Президенты Владимир Путин гамәлгә кертте. Аны аз керемле гаиләләр ала. Соңрак ил җитәкчесе мондый ярдәмне адреслы итәргә йөкләмә бирде. Шуңа бәйле рәвештә, 2021 елда ярдәм күрсәтү кагыйдәләре камилләштерелде.
