20 ноябрдән 22сенә кадәр Бөтендөнья татар конгрессы Россия төбәкләре һәм чит илләрдәге татар эшмәкәрләре өчен «Татарстанның эшлекле хезмәттәшләре» дип исемләнгән 15 нче форумын оештыра.
Форумда Россиянең 48 төбәгеннән һәм 13 чит илдән 300гә якын татар эшмәкәре катнашыр дип көтелә. Ел саен үткәрелә торган Татар авыллары эшмәкәрләре җыеныннан аермалы буларак, бу форумга шәһәрләрдә эшли торган татар эшмәкәрләренең дә чакырулы булуын ассызыклады оештыручылар.
Эшмәкәрләр 3 көн дәвамында Яшел Үзән районының сәнәгать объектлары һәм предприятиеләре белән таныша, «Корстон» сәүдә-күңел ачу үзәгендә пленар дискуссиядә катнаша алачак. Ә инде 22 ноябрь көнне Бәшир Рәмиев исемендәге технопаркта Татарстанның Президенты Рөстәм Миңнеханов катнашында пленар утырыш булыр дип көтелә.
