Башкортостанда 10 июльгә кадәр Бөтендөнья фольклор фестивале дәвам итә. Төрле халыкларның Фольклор күргәзмәсе, милли музыка, мәдәниятләр балкышы – тамашачыларга көн саен яңа программалар тәкъдим ителә.
Бәйрәмдә дөньяның 57 иленнән, шул исәптән Татарстаннан да кунаклар катнаша.
Мәдәниятләр халыкларны берәштерә. Сергей Обуховның игътибарын Венгриядән килгән кунакның гадәти булмаган беләзеге җәлеп иткән. Ул үзенчәлекле ысул белән үрелгән. Оста осталыкны бәяли. Үзе дә саламнан төрле әйберләр үрә.
Монысы шотланд сорнаена охшаган уен коралы. Хуҗасының милли киемнәреннән аңлашылганча, ул хорват гайдасы. Тавышы үзенчәлекле яңгырый. Һөнәрчелек күргәзмәсендә төрле халыкларның музыкасы ишетелә. Бөтендөнья Фольклор бәйрәме башкача була да алмый.
Тыңлыйсың да, гаҗәпкә каласың. Ничек итеп кубызда уйнап, тамак тавышы белән аһәңле итеп җырлап була икән? Россиянең халык артисты Надежда Бабкина да танылган башкорт музыканты Миндигафур Зәйнетдинов яныннан тиз генә китә алмады.
Фольклорчылар бәйрәмендә төп санитария кагыйдәләре катгый үтәлде. Күргәзмә ачык һавада узса да, анда битлексез кертмәделәр.
Медицина битлекләреннән тыш, аларның башка төрлеләре дә бар бит әле. Бөтендөнья Фольклор бәйрәмендә мәдәни мирас обьектларына кергән битлекләрне күрсәттеләр.
Башкортстанның Милли музеенда «Дөнья халыклары битлекләре» күргәзмәсе ачылды. Төрле үлчәмнәрдәге, карап торышка бик куркыныч күренгәннәре дә, үзләренә тартып торган бик матурлары да бар. Экспозициядә Аргентина, Португалия, Эстония, Италия, Африкадан, башка төбәкләрдән битлекләр тәкъдим ителгән.
Менә ул Халыкларның чын дуслыгы. Парад әле башланмаса да, бииләр инде. Якты төсләрдән күзләр камаша. Әләмнәр, милли киемнәр балкышына, музыка аһәңнәре, төрле теллләрдә яңгыраган җырлар кушылды. Бәйрәм шатлыгы барысын да берләштерде.
Фәнис Мөхәммәтов, Татарстан яңалыклары, Уфа шәһәре.
