Бүгеннән Татарстанда үз изоляция режимына бәйле кайбер чикләүләр бетерелде. Югары әзерлек режимы элеккечә үк гамәлдә кала. Хәзер өйдән чыгып китүгә рөхсәт алу өчен СМС хәбәр җибәрергә кирәкми, эшкә бару өчен аерым пропуск та таләп ителми. Азык-төлек кибетләреннән тыш, кечерәк мәйданлы сәнәгать товарлары маркетлары да эшләячәк. Ә менә битлек һәм перчаткалар киеп йөрү мәҗбүри булып калды.
Икътисадны торгызу — үз изоляция чорында күп кенә чикләүләрдән баш тартуның максаты шул. Татарстан предприятиеләренең туксан проценты инде эшли. Ә калганнары якын арада эшкә керешә.
Татарстан Республикасы Президенты Рөстәм Миңнеханов: «Мин катгый изоляция режимының кабат кертелүен теләмәс идем. Урыннардагы җитәкчеләрнең үзләренә ышанып тапшырылган территорияләрдә иминлекне саклап калып, барлык предприятиеләребезнең нормаль эшләвен тәэмин итүләрен сорыйм.»
Бүгеннән өйдән чыгып китү өчен СМС хәбәр белән рөхсәт алырга, эшкә барырга аерым пропуск та кирәкми. Азык-төлектән тыш, киемнәр, көнкүреш техникасы кибетләре, салоннар, шулай ук автоүзәкләр һәм остаханәләр, химик чистарту, көнкүреш хезмәте күрсәтү предприятиеләре дә эшли башлады. Аларның мәйданы дүрт йөз квадрат метрдан артмаска, аерым керү урыны булырга тиеш. Шулай ук уннан артык кеше катнашмаган очракта, никахларны теркәү рөхсәт ителә.
Татарстан Республикасы премьер-министры урынбасары, СOVIDКА каршы көрәш буенча оперштаб җитәкчесе Ләйлә Фазлыева: «Шул ук вакытта ял, тамаша, физкультура һәм башка чаралар үткәрү рөхсәт ителми.»
Ә менә шәһәрара автобус маршрутларына янә «яшел ут»бирелде. Шулай ук аз комплектлы мәктәпләр һәм күп кенә медучреждениеләр дә үз ишекләрен ачты.
Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе җитәкчесе Марина Патяшина: «Балаларга планлы вакцинация ясауны яңадан башлап җибәрәбез. Вакцинация вакытының килеп җитүенә анализ ясыйбыз. Чираттан төшеп калмаска, термометрияне үткәрергә кирәк.»
Татарстанда югары әзерлек һәм үз изоляция режимы тулысынча гамәлдән чыгарылмады.
Әлегә балалар белән дә, спорт һәм балалар мәйданчыкларына йөрергә киңәш ителми. Ә 65 яшьтән өлкәнрәк һәм хроник авырулары булган кешеләргә өйдә калырга тәкъдим ителә. Үз изоляция режимын бозган өчен штрафлар да үз көчендә кала.
Инна Данилова, Дамир Мөхәммәтханов.
