Бүген Россиянең беренче Ай-Ти шәһәре Иннополисның рәсми теркәлүенә 5 ел. Казаннан 40 чакрым ераклыкта урнашкан калага 2012 нче елда нигез салынды. Ул тиз үсә. Иннополис аерым икьтисадый зонасы барлыкка килде, аның резидентлары табыш, керем, милек, җир һәм транспорт салым ташламаларыннан файдалана. Биредә яшәүчеләрнең уртача яше 30дан артмый. Шәһәр статусы алгач, 181 бала туган. Балалар бакчалары, мәктәп эшли. Айти-лицей интернатында укучылар төгәл фәннәрне тирәнтен үзләштерә. Ә Иннополис университеты мәгьлүмат технологияләре һәм робот техникасы белгечләрен әзерли. Ул Россиянең иң популяр биш югары уку йорты арасына керә. Хәзер 37 илдән 771 студент белем ала. Иннополис “Акыллы шәһәр” федераль проектының пилот проектларының берсе. Биредә күп кенә техник казанышларга тест уздыралар.
#5tayInnopolis
Иннополис үзенең беренче юбилеен гадәти булмаган онлайн форматта билгеләп үтә, туры трансляцияне дөньяның теләсә кайсы урыныннан карап булачак.
