Бүген республикада инвалидлар ункөнлеге башлана. Быел эпидемиологик вәзгыятькә бәйле рәвештә, мәдәни-күңел ачу чараларының төп өлеше онлайн-форматта уза. Ә мөмкинлекләре чикле күп кенә кешеләргә якыннан көндәлек ярдәм дә кирәк.
«Демография» илкүләм проектының «Өлкән буын» программасы нигезендә республикада «Сиделка» дәүләт хезмәте барлыкка килде. Сынау проектына Казан, Чаллы, Әлмәт, Алабуга, Яшел Үзән һәм Түбән Кама районнары кушылды.
Быел инвалид балалар тәрбияләүче 270 гаиләгә бер тапкыр бирелә торган матди ярдәм күрсәтелә. Казандагы сәламәтлек саклау учреждениеләре лаборатор һәм функциональ тикшеренү алымнары ярдәмендә, өйдән чыгып йөри алмый торган инвалидларның саулыгын тикшерүне оештыра.
Дару белән тәэмин итү һәм медицина хезмәте күрсәтү буенча киңәшләрне телефоннан алырга була. Кайнар линия телефоны иртәнге сәгать сигездән дүрткә кадәр эшли. Өйдә социаль хезмәт күрсәтүгә мохтаҗ ялгыз инвалидларның фатирларын, йорт яны территорияләрен җыештыруда ярдәм күрсәтелә.
Мөмкинлекләре чикләнгән кешеләр иҗатының традицион республика фестивале «Кулга тотынышыйк, дуслар!» видеоформатында уза. Заявкалар Татарстанның 19 учреждениесеннән килгән инде, хәзер сайлап алу этабы тәмамлана, ә декабрьдә гала-концерт була. Аны социаль челтәрләрдән карап булачак. Балалар һәм яшьләр өчен китап клубында сәнгать әсәрләре уку, зирәкләр, тапкырлар онлайн-викторинасы, музыкаль кичәләр, осталык дәресләре оештырыла. Үткәрү даталарын һәм мәйданнарын күрсәтеп, тулы чаралар исемлеген Казан мэриясе сайтыннан карарга мөмкин.
Инвалидлар ункөнлегендә мохтаҗларга социаль ярдәм дә оештырыла. Казанда 86 мең чамасы инвалид яши, шуларның 5 меңнән артыгы – балалар. Инвалид балалар тәрбияләүче гаиләләргә мөлкәткә салым буенча ташламалар бирелә. Мондый практика беренче тапкыр Казанда 2018 елда кулланылды, хәзер Министрлар Кабинеты йөкләмәсе буенча республиканың башка шәһәрләренә, районнарына да таратыла.
