Бүген мәшһүр җырчы, Россиянең атказанган, Татарстанның халык артисты Хәйдәр Бигичевның туган көне. Арабыздан бик иртә киткән артистка 71 яшь тулган булыр иде. Башкалабызда Азино бистәсенең Хәйдәр Бигичев урамындагы 27 нче йорт диварына мәшһүр җырчының сүрәтен ясаганнар. Янәшәдәге бинага шулай ук танылган шәхескә багышланган графитти ясалачак. Ул Хәйдәр Бигичевның иҗади эшчәнлеген чагылдырачак. Әлеге йортлар янында сквер ачу да күздә тотыла.
Хәйдәр Бигичев Муса Җәлил исемендәге Татар Дәүләт опера һәм балет Академия театрының әйдәп баручы опера солисты иде, композиторлар һәм халык җырларын югары професииональ дәрәҗәдә башкарды. Дүрт ел элек туган төбәге Түбән Новгород өлкәсендәге Уразавылда җырчы истәлегенә һәйкәл дә ачылды.
