Бүген Казанда йогышлы авырулар хастаханәсенең яңа корпусы ачыла. Аны апрель ахырында Татарстан Президенты Рөстәм Миңнеханов күрсәтмәсе буенча төзи башлаганнар иде. Объект кыска вакыт эчендә-100 көндә салынды. Дүрт катлы бина биш йөз пациентны кабул итә ала. Татарстан өчен мондый тәҗрибә – беренче тапкыр. Проектны Россия хөкүмәте рәисе Михаил Мишустин югары бәяләде. Әлеге тәҗрибәне киләсе проектларда да кулланырга планлаштыралар. Процессны заманча технологияләр тизләтәчәк. Ел башыннан Татарстанда төзелешкә рөхсәтне онлайн режимда алырга мөмкин. Төзелеш министрлыгында төзүчеләрне электрон хезмәтләрдән файдаланырга чакырдылар.
Амбициоз, масштаблы, стратегик яктан мөһим һәм беренче карашка үтәлмәслек бурыч кебек иде – йогышлы авырулар хастаханәсенең яңа корпусын нибары 100 көн эчендә төзеделәр. Нигезеннән башлап, тиешенчә комплектлауга кадәр. Мондый казанышка Татарстанда гына ирешергә мөмкин. Яңа корпус бүген үк пациентларны кабул итәргә әзер диярлек. Татарстан Президенты күрсәтмәсе белән яңа корпус тиз арада сафка басты.
Рөстәм Миңнеханов Татарстан Республикасы Президенты
Ул чакта федераль үзәктә инициативаны хупладылар, 28 апрельдә «Ак таш» төзелеш компаниясе булачак корпус нигезенә беренче таш салды. Төзелешнең 70 нче көненә әзер бинаны Россия премьер-министры Михаил Мишустин карады.
Михаил Мишустин Россия Федерациясе Премьер-министры
Тагын 30 көннән соң файдалануга тапшыру өчен барлык рөхсәт документлары да алынды, бина тирәли чыршы агачлары утыртылды, палаталарда ут яна, ә ординатор бүлмәләрендә җиһазлар куелды. Йогышлы авырулар хастаханәсе пациенты беренче булып бокска урнаша. Табиб бирегә чиста зонадан керә. Башка инфекцияләр белән бәйләнеш була алмый.
Әгәр мөрәҗәгать итүчене хастаханәгә урнаштырырга кирәк булса, табиб һәм пациентның юллары аерыла. Берсе чиста зона буенча бара. Палаталарда санузел, һәр түшәктә чакыру төймәләре, кислород чыганагы, тәрәзә артында — телевизорлар. Палаталарга кермичә генә чистарту, авырулар белән туры элемтәләрне киметү өчен, барысы да булдырылган. Азык-төлекне дә махсус тәрәзәләрдән тапшырачаклар. Медикларның һәм пациентларның каты бүленеше — һәркайсының сәламәтлеге өчен. Табибларның да сәламәтлеге тиешенчә сакланырга тиеш. Яңа корпуста 120 бокста биш йөзгә кадәр кешене кабул итә алачаклар.
Республика йогышлы авырулар хастаханәсе баш табибы Марат Гатауллин: «бу авырулар буенча компетенцияләр үзәге, консультатив ярдәм күрсәтеләчәк, авырулар дәваланачак. База тиешенчә җиһазландырылган — компмография, эндоскопия, лаборатория бар. Штат Казан шәһәренең төрле участокларында урнашкан, Ершов урамында корпус, Окольная урамында балалар клиникасы, лаборатория монда булачак. Коллектив бердәмгә җыелачак, балалар корпусын ачу күздә тотыла.»
Бу планнар пандемия белән хәл тотрыклангач гамәлгә ашырылачак. Әлеге корпусны заман таләпләренә туры китереп төзегәннәр. Авыруларны дәвалау өчен барлык шартлар да тудырылган.
Эльмира Җәләева, Дамир Мөхәммәтханов, Татарстан яңалыклары.
