Татарстанда эссе һава торышы саклана. Бүген көндез һава температурасы 35-38 градуска кадәр күтәреләчәк. Иртәгә дә шулай булыр дип фаразлый синоптиклар. Шуңа бәйле рәвештә республикада ике тәүлеккә шторм кисәтүе игълан ителде. Гадәттән тыш хәлләр министрлыгы кешеләргә кирәк булмаган вакытта урамга чыкмаска, күбрәк су эчәргә, салкын компресслар ясарга, физик йөкләнештән качарга киңәш итә.
Ә менә бу эссе көннәрне ничек кичерергә, ни өчен күп итеп салкын су эчәргә, кондиционер булган бүлмәләрдә озак торырга ярамый? Матбугат конференциясендә белгечләр шулай ук эсселектән, кояш сугудан саклану чаралары белән дә таныштырдылар.
***
Эссе көннәрдә Наталья Толкушкина сусыз урамга чыкмый. Кызуны су кулланып жиңелрәк кичерүен әйтә. Табиблар да шуны искәртә.
ТР Сәламәтлек саклау министрлыгының гомуми табиблык практикасы буенча штаттан тыш баш белгече Люция Фейсханова: «Кеше организмында су кими башласа, кан тизрәк куера, ягьни тромбоз барлыкка килү куркынычы бар. Башта кеше моны үзе сизмәскә дә мөмкин. Ахыр чиктә моның инфарктка, инсультка, җитди катлаулануларга китерүе ихтимал.»
Кешегә тәүлеклек су нормасы бер килограммга 30 миллилитр булырга тиеш. Нормадан тыш та эчәргә була, иң мөһиме- бозлы салкын су кулланмаска кирәк, югыйсә авырып китү куркынычы арта. Мондый эссе көннәрдә күпләрне кондиционер коткара, тик биредә дә температура түбән булырга тиеш түгел. Сулыклар янында ял итәргә яратучыларны һава температурасының кискен үзгәреп торуын көзән җыеруга китерү куркынычы турында да искәрттеләр. Баш әйләнү яки авырту, күңел болгану, тәннән салкын тир чыгу – кояшта эссе сугу билгеләре булырга мөмкин. Тән температурасы 40 градуска кадәр күтәрелсә, кеше аңын югалта. Кичекмәстән ашыгыч ярдәм чакыртырга кирәк.
Хәзер хайваннарга да җиңел түгел. Әгәр йорт хайваннары турында кайгыртучылар бар икән, хуҗасызларына бу көннәрдә су табуы кыен. Эсселектән үзегезне дә, хайваннарны да саклагыз.
Анастасия Аксенова, Владимир Юрков.
