Бүген 12 декабрь – Россия Федерациясе Конституциясе көне. Әлеге дата илебездә бик мөһим дәүләт бәйрәме буларак билгеләп үтелә.Шул уңайдан Татарстан Дәүләт Советы Рәисе Фәрит Мөхәммәтшин, Республика халкын котлады.
Хөрмәтле татарстанлылар! Россия үзенең яңа Төп законына моннан 29 ел элек, 1993 елның 12 декабрендә ия булды. 1993 елгы Конституция- Россия җәмгыятен төзүнең төп принципларын – гражданның хокуклары һәм ирекләренең үзгәрмәс хәлен, дәүләт бердәмлеген һәм территориаль бөтенлекне саклауны, идеология күптөрлелеген, традицион рухи-әхлакый кыйммәтләрне яклауны ышанычлы беркетте. Шушы нигезләмәләрнең какшамас булуын раслап, 2020 нче елда Россия Федерациясе Президенты Владимир Путинның башлангычы белән гамәлгә ашырылган һәм илнең күпчелек халкы хуплаган конституция реформасы бу сәяси нигез документны шактый көчәйтте. Социаль гарантияләрне һәм илкүләм мәнфәгатьләрне яклау мөмкинлекләрен арттырды, дәүләтнең суверенитетын ныгытты. Бүген Татарстан ил Конституциясендә күрсәтелгән юнәлештә эзлекле бара. Тормыш сыйфатын яхшырту, алга таба да сәяси һәм социаль-икътисадый үсү өчен хокукый нигезләрне киңәйтү максатларында республика законнарын камилләштерә.Куелган максатларга ирешү өчен әле бик күп хезмәт итәргә кирәк булса да, иң мөһиме – Төп законны үтәп һәм хөрмәт итеп уртак мәнфәгатьләр һәм ниятләр белән яшәү.Барыгызга да нык сәламәтлек, тынычлык, иминлек һәм республика, бөтен Россия хакына иҗади хезмәтегездә уңышлар!
