Август аенда берничә закон һәм кагыйдә үз көченә керә. Яңалыклар пенсионерларга кагылачак — пенсиянең тупланма өлеше арта, ОСАГО полисыннан файдаланучы автомобиль хуҗаларын һәм җәмәгать урыннарында кальян белән ял итәргә яратучы яшьләргә дә яңалыклар кертелә. Тулырак мәгълүмат киләсе язмада.
Кальян куллану моңа кадәр дә чикләнгән иде, хәзер җәмәгать урыннарында төрле төр тәмәке тарту тыела. Кальян, вейплар, электрон тәмәке — август башыннан тәмәке әйберләренә тиңләштерелгән, ягъни аларны кулланучылар «Гражданнарның сәламәтлеген әйләнә-тирә тәмәке төтене йогынтысыннан саклау турында» гы закон маддәсенә автомат рәвештә эләгәләр. Ә бу административ хокук бозу.
20 миллиграммнан артып киткән никотинлы продукция сатучылар, шулай ук тәмәке продуктларына реклама ясаучылар закон маддәсенә эләгә.
24 августтан ОСАГО полисына бәяләр үзгәрәчәк. Кагыйдәләрне төгәл үтәүче машина йөртүчеләргә полисның минималь бәясе 2471 сум булачак. Ә менә кагыйдәләрне еш бозучыларга күбрәк түләргә туры киләчәк. Алар өчен бәяләр биш мең дүрт йөз утыз алты сумга кадәр артачак.
Августта эшләүче пенсионерларга пенсияләрне яңадан исәплиләр. Хезмәт хакыннан кергән иминият взнослары исәпкә алыначак. Максималь өстәмә 279 сум булачак. Пенсиянең тупланма өлеше дә- 9,13 процентка артачак.
Пандемия сәбәпле, эшен югалтучыларга да яңалыклар бар. Мондый хезмәткәрләр пособие алачак. Эш бирүчеләр эштән киткәннән соң икенче ай өчен уртача айлык хезмәт хакын түләргә тиеш. Моның өчен хезмәткәрнең компаниядә бер айдан артык эшләве шарт.
