Алабугада Нур мәчете төзелеп бетте. Тойма урамындагы яңа мәчеткә 2 ел элек нигез салынган иде. Ул иске мәчет сүтелгәч, шушы урында төзелде. Изге йорт рәсми төстә ачылмаса да, дин кардәшләребез өчен аның ишекләре инде ачык . Мәхәллә иганәчеләр һәм аерым кешеләр акчасына сафка басты.
«Нур» мәчете дин тотучылар өчен февраль башында ук ишекләрен ача. Мәхәлләнең тирә-ягы гына төзекләндерелмәгән була. Ниһаять, узган атнада барлык төзекләндерү эшләрен дә тәмамлаганнар. Мәчетнең имам-хатыйбы Рәшит Шәйхетдинов сүзләренә караганда, мәчетне төзү җиңел булмаган, шулай да авырлыклар артта калган.
Исегезгә төшерәбез, иске бина узган гасырның 50 нче еллары ахырында ук төзелгән. 1991 елда иске баракны ремонтлап, мәчет ясыйлар. Ул өч дистә елга якын эшли. 2 ел элек шәһәр хакимияте бу урында яңа мәчет төзергә карар кыла. Гомуми мәйданы – 90 квадрат метрлы мәчет берьюлы сиксәнгә кадәр мөселманны сыйдырган.
Рәшит Шәйхетдинов үз куллары белән мәчет төзелешенә үз өлешләрен кертүчеләрнең исемнәре язылган китап әзерләгән.
Кемдер 500 сум акча биргән, кемдер 3 мең, кемдер 10, ә кемдер 50 сум биргән. Мәчет төзелешенә 2 миллион сумга якын акча киткән. Матди ярдәм күрсәтә алмаучылар төзелеш эшләрендә катнашкан. Ә кемдер төзелеш материаллары белән ярдәм иткән.
Яңа мәчеттә мөмкинлекләре чикләнгән кешеләр өчен дә шартлар тудырылган. Тантаналы ачу җәй ахырында планлаштырыла.
Гөлназ Гайни
