Алабуга шәһәре предприятиеләре һәм оешмалары хезмәткәрләре шәһәрне чистартуга алынганнар. Алар территорияләрне җыештыру буенча өмәләр башлап җибәргәннәр. Кулларына көрәк һәм себеркене беренчеләрдән булып район Советы һәм башкарма комитеты хезмәткәрләре алган.
Нәни Мәликә өчен бу тормышта беренче чын өмә. Ул район башкарма комитетында эшләүче әнисенә ярдәм итәргә килгән. Үз балалары белән бирегә башка хезмәткәрләр дә килгән. «Чебурашка» паркы балалар белән йөрү өчен яраткан урын, аны үзебезгә тәртиптә тотарга кирәк – диләр акциядә катнашучылар
Алабуга муниципаль район Советы Аппараты җитәкчесе Илмир Камалетдинов:» үзебез үрнәк күрсәтәбез. Бу паркта балаларыбыз белән йөрергә чыгабыз. Шуңа күрә аны үзебез төзекләндерергә тиеш. Кәефләр шәп. Җәйге сезонга әзерләнәбез.»
Борынгы шәһәр елдан-ел үзгәрә. Үзгәрешләрне күреп сөенәбез, — диләр Алабугада яшәүчеләр. Ә мондый матурлыкны үз көчләре белән дә сакларга мөмкин. Бу бер дә кыен түгел.
Алабуга муниципаль районының Контроль-хисап палатасы рәисе урынбасары Ольга Доронина: «инфраструктура үзгәрә, байый, чәчәкләр күп үстерелә, балалар мәйданчыклары да елдан-ел арта.»
Хакимиятнең бүлек башлыклары, белгечләр, депутатлар кулларына чиләк, көрәк, себерке алып, чистартырга, төзекләндерергә кереште. Чүп-чар җыю, кар көрәү, паркны төзекләндерү өчен ике сәгать вакыт кирәк булды. Акция башында — район лидеры Рөстәм Нуриев.
Алабуга муниципаль районы җитәкчесе Рөстәм Нуриев: «кыштан соң бераз тәртипкә китерергә кирәк.Бу халыкның үз шәһәренә мөнәсәбәтен күрсәтә. Әгәр без башлап йөрмәсәк, өмә оештырмасак, яшьләрдә туган җиргә карата мәхәббәт тәрбияләп булмаячак.»
Традицион язгы өмә эстафетасын бу атнада ук инде муниципалитетның башка предприятиеләре һәм оешмалары да хуплады.
Ания Гыйбадуллина, Дмитрий Второв, Ленар Хәбибуллин, Рөстәм Муллагалиев.
