Авыл спортына – киң мәйдан. Актаныш районы авыл җирлекләре бер ай дәвамында иң көчле волейбол җыелма командасын ачыклады. Финалга сигез команда чыкты. Актанышбаш командасы район чемпионы булды. Киров һәм Чалманарат командалары призлы урыннарны алды. Җиңүчеләрне кубок, медальләр белән бүләкләделәр.
Ярышлар авыл кешеләренең волейбол белән кызыксынуын янә бер кат раслады. Районда язгы чәчү, урып-җыю тәмамлангач, төрле спорт чаралары үткәрелә. Оешма-предприятиеләр арасында да волейбол ярышлары узган иде. Яңа ел каникулларында татарча көрәш, чаңгыда узышу, өстәл теннисы, бадминтон, хоккей ярышлары оештырыла.
Команданы оештыруның үз нечкәлекләре бар. Киров авылының эшмәкәрләре командага матди ярдәм күрсәткән. Бердәмлектә- көч диләр. Былтыр кировлылар өченче урын белән канәгатьләнсә, быел тагын бер баскычка күтәрелеп икенче урынны яулады.
Иң яхшы сакчы исеменә Чалманараттан Фәрхәт Ризванов лаек булды. Иң яхшы һөҗүмче булып Кировтан Дмитрий Акимов, иң яхшы берләштерүче булып Актанышбаш авылынан Илгиз Газетдинов танылды. Ярышларның иң өлкән уенчы, Киров авыл командасыннан Ильяс Мортазинга истәлеккә волейбол тубын бүләк иттеләр.
Ләйсән Газизова, Актаныш районы мәгълүмат үзәге.
