Актаныш район үзәгендәге “Яран” торак ширкате күпфатирлы йортларның подъездларын дезинфекцияли башлады. Подъездагы баскычлар, аларның култыксалары, фатир ишекләре, почта тартмалары, катлар арасындагы мәйданчыкка куелган велосипедлар, кыскасы, нәрсә бар барысы да натрий гипохлоридының 15 процентлы эремәсе белән эшкәртелә. Препаратны даруханәдән сатып алалар. Кулланылучы дезинфекция чарасы әйләнә-тирә мохитка һәм кешеләр сәламәтлегенә куркынычсыз.
Ширкать тарафыннан коронавирустан профилактика чаралары икенче тапкыр башкарыла. Алдагысы яз башында уздырылган иде. Ленин проспекты һәм Җиңүнең 30 еллыгы урамындагы 8 квартал йортлары, үзәк хастаханә артындагы торак йортларның керү юллары да антисептиклар белән эшкәртелде. Бүген исә беренче һәм икенче кварталлар, 15 апрельдә Юбилей, Татарстан урамынарындагы, Ленин проспектындагы һәм РТС бистәсендәге йортлар да дезинфекцияләнәчәк.
