Аксубай районының Яңа Дума авылы халкы элек-электән мәгърифәткә, дингә тартылган. 20 гасыр башында биредә өч мәхәллә эшләгән. Утыз ел чамасы элек төзелгән яңа мәчет, капиталь ремонттан соң, кабат ишекләрен ачты.
Мәчет яны территориясен җәйге матур эскәмияләр, зәңгәр чыршылар бизи. Изге йортны кабат ачу бәйрәменә олысы-кечесы җыелды. Башкалабыздан да мәртәбәле кунаклар килгән иде.
Мәчетне бу җәй дәвамында ремонтлаганнар. Изге эшкә ике иганәче алына, аларга авыл кешеләре булыша.
Утыз ел чамасы элек салынган мәчетнең эчке дивары агач белән тышланган, идәнгә келәмнәр җәелгән. Түшәм, тәрәзәләр, җылылык системасы алыштырылган. Иганәчеләр, әниләре шушы авылдан булган – Равил Кузюров белән Рәис Сөләйманов.
Мәчеткә кешеләрнең күпләп йөрүен телибез, ди мөфти.
Яңа Дума авылында узган гасырның утызынчы елларында өч мәхәллә гөрләп торган.Тик икесендә ут чыгып, янып беткәннәр. Ә берсен саклап калганнар. Соңрак аның урынында кирпечтә яңасын төзиләр. Мәчетле авылның якты киләчәге бар.
Татарстан яңалыклары, Аксубай районы.
