Алдагы язмабыз Саба районының Иләбәр авыл җирлегендә узган Айсаф Галиев истәлегенә көрәш турниры турында. Батыр егет бу елның беренче маенда Украина җирләрендә хәрби операция зонасында хезмәт бурычын үтәгәндә һәлак була. Спортның көрәш төрендә чыныккан Айсаф Галиевнең исемен, көрәшчеләр шушы турнир белән дә мәңгеләштерү кирәклеген әйтәләр. Беренче турнирга 6 район көрәшчеләре җыелган иде.
Айсаф Галиев бездән хәзер дога гына көтә. Аның рухын изге сүзләр белән генә шатландыра алабыз. Мөдәррис хәзрәт Гыймранов көрәш турнирын корьән аятьләре укып ачып җибәрде. Батыр егет белән горурланып, аның гаиләсенә, ил – көнгә иминлек, күкләргә тынычлык теләп куллар догага күтәрелде.
Айсаф Айдар улы райондашларын, колективын, җитәкчеләрен, келәмдәш дусларын бүген менә шулай рәсемнән генә күзәтте. ”Милләтемнең якты кояшы син”, диеп аның исемен мәңгеләштерәләр. Шигъри юлларда сагыну ачысы, горурлану хисләре, зур җиңүләр истәлеге диплом-мактау кәгазьләре.
Аны югалту гаиләсе өчен генә түгел, район, республика өчен дә зур кайгы.Кыска гына гомерендә ул олы эшләр эшләргә өлгерә.Россия эчке эшләр министрлыгы идарәсенең Казан шәһәре буенча 6нчы номерлы “Савинова” оператив пунктында тикшерүче булудан Саба районы Миграция бүлеге начальнигы вазыйфасына кадәр хезмәт юлы үтә. Айсафның әтисе Айдар Галиев улының якты истәлеген мәңгеләштерүче башлангычны хуплый. Ул үзе дә күп тапкырлар Республика чемпионы, призеры, спорт остасы , 11 тапкыр районның баш батыры булып калган көрәшче.
Галиевләр гомумән көрәшчеләр нәселе.Ярышларны ачып аләмне бертуганнар Айдар, Азат Галиевләр күтәрде. Турнирга Саба, Арча, Мамадыш, Кукмара, Балтач, Теләче районнарының чын көрәш осталары килде. Ярышларның югары дәрәҗәдә узуы өчен янып көеп йөргән Алмаз Зариповның теләкләре чынга ашты.
Ниятле эш таркалмый диләр. Башлангыч матур борылыш алды. Күпме спортчылар очрашты.Аралашты. Келәмдә чын көрәш тантана итте. Айсафның рухлары да шат булып бу манзараны күзәткәндер. Һәркем бу турнирдан киләсе турнирга кадәр диеп саубуллашты.
Эльза Әхмәтҗанова, Райлә Галәвина, Ирек Солтанов, Татарстан яңалыклары, Саба районы
