Аның авыру тарихы 16 елга сузыла. Без Айдар Зиннәтуллин язмышы турында өченче тапкыр күрсәтәбез. Ул сирәк очрый торган баш мие авыруы белән чирли. Ике ел элек сезнең ярдәм белән малайга операция ясаганнар иде.Тик хәле кабат начарайган. Чит илдә операциядән соң кабат тикшерү үткәрергә кирәк. Беренче карашка Айдар 16 яшьлек сәламәт яшүсмер егет. Тик медицина картасы гына башкача аңлата. Авыру тарихы китабында язарга урын да калмаган – каты авыру тарихы менә 3 айлык чагыннан бирле языла инде, ул чакта эпилепсия өянәге башланган. 13 яшендә өянәкләр ешайган, каты формага күчкән. Аңыен югалтып, үз хәленә озак килгән чаклары да булган. Айдарга сирәк очрый торган диагноз – полимикрогирия куелган, ул малайның үсешен тоткарлый. Табибларның фаразлары бик үк өметле булмаса да, терелтүгә өмет сүнмәгән.
Айдарның әнисе Светлана Зиннәтуллина Айдарның әнисе: “Айдар опреациядән соң, үз хәленә бик авыр килде. Тернәкләнү өчен ярты ел кирәк булды.”
Операция ун сәгатькә сузылган. Тагын ярты ел тернәкләнгән. Ул көннәрне Светлана күз яшьләре белән искә төшерә. 2018 елның апреле Айдарның тормышын ике өлешкә бүлә. Хәзер ул яңа күнекмәләрне үзләштерә – кулына кружка тотарга өйрәнгән, һәр нәрсә белән кызыксына, беренче тапкыр мәктәпкә барган. Өянәкләре сирәгәйгән, әмма башка авырлыклар килеп чыккан.
Айдарның әнисе Светлана Зиннәтуллина :” Баш миендә сыеклык җыелып тора, әле гыйнварда гына тикшерү узды, кабат сыеклыкның күп җыелганлыгын күрсәтте.”
Бу авыр операция нәтиҗәсеме, әллә башкача тайпылышмы – моңа операция ясаган табиблар гына җавап бирә ала. Германиядә Айдарны апрельдә көтәләр, ә гаиләнең дәвалау өчен түләү мөмкинлеге юк. 501 мең 620 сум кирәк. Булышырга теләүчеләргә карта номеры экранда күрсәтелгән.
Регина Сафиуллина, Сергей Павлухин.
