Без бүген пенсионер Асия Шамкина тарихына кабат әйләнеп кайтабыз. 86 яшьлек әби таланган фатирда коточкыч авыр шартларда яшәргә мәҗбүр иде. Бәхетенә, битараф булмаган кешеләр ярдәм кулын сузды. Фатирны күмәк көч белән ремонтладылар. Биредәге үзгәрешләрне хәбәрчебез дә күреп кайтты.
Әбинең кайнар күз яшьләрен елмаю алыштырган. Кәефе дә бик күтәренке. 86 яшьлек пенсионер Асия апа Шамкина хәзер үзен бөтенләй башка дөньядагы кебек тоям, ди.
Ә бит әле күптән түгел генә ул үз проблемасы турында безгә җан ачысы белән елап сөйләде. Монда мебель дә , идәндә линолеум да юк иде. Асия Шамкинаның фатирын кызының психик авыру булган элеккеге ире шундый аяныч хәлгә китерә.
Асия Шамкина: «ул боларның барысын да җимереп китте.Чәй эчәргә чынаягым да калмады.Күршеләр тәлинкә биреп торды. Биредәге комодны да аягы белән типкәләде, бик курыктым. Шкафны пычак белән каерды.»
Бер атна эчендә барысы да үзгәргән. Битараф булмаган кешеләр әбигә мебель биргәннәр, ремонт ясарга булышканнар. Хәзер фатирда раковина, яңа шкафлар да бар, иң мөһиме – ике карават.
Асия Шамкина: «Без беренче көнне үк бик тыныч йокладык. Әле кайчан гына төнгә 3-4 тапкыр уянып, тынычсыз йоклый идек. Хәзер бик уңайлы. Тормышымда мондый рәхәтне күргәнем булмады.»
Асия Шамкина “Душа России” волонтерларының ялгыз картларга булышудагы яңа проектында беренче кеше. Хәзер башка өлкәннәр исемлеге формалаша.
«Душа России » волонтерлар хәрәкәте җитәкчесе Юлия Хәкимова: «бу әбигә ремонт ясауны Лика исемле кыз үз өстенә алды. Моның өчен аңа рәхмәт. Ярдәм иткән барлык кешеләргә дә рәхмәт, ә без алга таба да ярдәм итәчәкбез.»
Берничә ялгыз пенсионер чираттагы могҗизаны көтә.
Айнур Вәлиәхмәтов, Сергей Павлухин.
