Буа ветеринария техникумы туксан еллык юбилеен билгеләп үтте. Уку йортының тарихы 1931нче елның 25 августыннан башлана. Техникум шәһәр һөнәр училищесы бинасында урнашкан була. Беренче вакытта ул ветеринарлар әзерләү юнәлешендә эшли. Соңрак белгечлекләр исемлеге киңәйтелә. Юбилей тантанасына уку йортын төрле елларда тәмамлаучылар, укытучылар чакырылган иде. Хис-кичерешләре белән алар безнең Буа районындагы хәбәрчебез Алсу Сәмигуллина белән дә уртаклашты.
Буа ветеринария техникумын дистә еллар дәверендә меңләгән белгеч тәмамлаган. Күбесе укуларын югары уку йортларында дәвам итә, дәрәҗәле исемнәргә лаек була. 2000нче ел чыгарылышы Дамир Хәйруллин бүген Казан дәүләт ветеринария медицинасы академиясендә укыта. Фармакология, токсикология һәм радиология кафедрасы доценты.
Әлки авылыннан Әлфит Фәттахов та ветеринария техникумын тәмамлаган. Нәкъ 50 ел элек. Ул техникумда алган һөнәренә тугры калып, гомере буе авылында ветеринар булып эшли.
1998нче елга кадәр техникум бары тик ветеринарлар гына әзерли. Елына якынча 120 кеше чыгарыла. Директор вазыйфасына Вәгыйзь Сөнгатов килгәч, белгечлекләр исемлеге шактый киңәйтелә. Бухгалтерлар, юристлар, социаль хезмәткәрләр, урман хуҗалыгы белгечләре, фермерлар, зоотехниклар һәм газчылар укыта башлыйлар.
Техникумның матди базасы да яңартыла. Яңа бина төзелә. Көчле укытучылар коллективы формалаша. Ветеринария техникумы Россия әһәмиятендәге уку йортына әверелә.
Бәйрәм кунаклары туган уку йортларында тормышның бүген дә кайнап торуына шат иде. Яхшы белгечләр әзерләү традициясе дәвам итә.
Алсу Сәмигуллина, Ильнур Кадыйров. Татарстан яңалыклары.