Яшел Үзән районы Әйшә авылында яшәүче яңа ел бәйрәмендә пиротехника белән эшләгәндә бармакларыннан мәхрүм калган. Республикабызда тагын ике шундый очрак тикшерелә. Шул ук вакытта, салкыннарга карамастан, Татарстанда саф һавада 6500 ләп бәйрәм чарасы уздырылды, аларда 800 мең кеше катнашкан.
Татарстан халкы һәм кунаклары иң күп йөргән урыннар — Казан Кремле, Зөя музее, Борынгы Болгар, Казан циркы, «Әкият» курчак театры һәм Кыш-Бабай резиценциясе. Казанда Яңа ел бәйрәмнәренә 170 мең турист килгән. Күбесенчә кунаклар Мәскәүдән, Мәскәү өлкәсеннән һәм Санкт-Петербургтан килгән. Поездда түгел, ә машинада, яңа М12 юлыннан. Кунакханәләрдә буш урыннар булмаган диярлек.
Яңа ел төнендә халык Казанның төп чыршысы янында бәйрәм итте. Биредә 13нче гыйнвар көнне дә Гаилә елы башлану хөрмәтенә Яңа ел тамашасы көтелә.
Миләүшә Гыйльфанова, Инна Данилова, Ильдар Галәветдинов, Татарстан яңалыклары.
