100 яшьтә дә “Хәрәкәттә – бәрәкәт” дип сөенеп, юбилеен каршылый Актаныш йөзяшәре. Пучы авылында гомер итүче Халидә Гәрәеваны йөз яшьлек юбилее белән Актаныш муниципаль районы башлыгы Энгель Фәттахов котлады. Дулкынландыргыч мизгелләр киләсе репортажда.
Халидә Сәетгәрәй кызының туган көне Бөек Җиңү бәйрәмен каршылаган вакытка туры килә. Халидә апаның быелгы юбилее аеруча истәлекле, үзенә 100 яшь, Бөек Җиңүгә 75 ел тула. Юбилей бүләкләрен ике дата уңаеннан кабул итте ул. Россия Президенты Владимир Путинның, Татарстан Президенты Рөстәм Миңнехановның котлау хаты белән бергә, район башлыгы үзенең тәбрикнамәсен, чәчәк гөлләмәсен, истәлек бүләкләрен тапшырды.
Халидә Гәрәева яшьли партия сафларына кабул ителә. Комсомол секретаре булып эшли. Мөгаллимлек хезмәте белән бергә, авылда агитация-пропаганда эшендә актив катнаша. Җирле радиодан чыгышлар ясый. Колхозчыларга лекцияләр укый. Гомерлек ярын да мәктәптә очрата: ире, Бөек Ватан сугышы инвалиды, ветеран Касыйм Миргалимов белән Качкын авылында укытучы булып эшләгәндә таныша.
Биредә бер ел мәктәптә укыткач, яшь укытучыларны Мөслим районы Сәет авылына укытырга җибәрәләр. Лаеклы ялга чыкканчы, шушы авыл сулышы белән яши алар. Соңыннан Халидә апаның туган авылы Пучыга күченәләр. Улы, ике кызы кайгыртуында бәхетле картлык кичерәләр. Хәзер Халидә апа кызы Рәмилә апа тәрбиясендә.
Кызы Рәмилә апа әнисенең яшь чагында бакчачылык белән ныклап шөгыльләнүен дә искә алды. Былтыр да Халидә апа көздән карлыган куакларын утыртырга җир әзерләп куйган. Менә шулай 100 яшендә дә хәрәкәттә-бәрәкәт дип бер гасырлык юбилеен каршылый Актаныш йөзьяшәре.
Ләйсән Газизова.
