Татарстанда 21нче августтан 10 нчы сентябрьгә кадәр “Игътибар балалар” профилактик акциясе үтә. Максаты — балаларның иминлеген тәэмин итү, хәвеф-хәтәрне кисәтү. Соңгы 7 айда республика юлларында 257 юл-транспорт фаҗигасе теркәлгән, анда 8 бала вафат була, 271 е төрле дәрәҗәдәге тән җәрәхәтләре ала.
Саба районында җәйге чорда балалар катнашында юл һаләкәте теркәлмәгән. ЮХИДИ инспекторлары һәрдаим профилактика чаралары уздырып тора. Ул аеруча уку елы башлангач көчәя.
Электросамокатлар бүгенге көндә балалар арасында иң куркыныч транспорт чарасы булып санала. Аларның иң актив вакыты да кичке якта. Соңгы өч айда инспекторлар кагыйдә бозган 7 электросамокатлы баланы туктата. Баланың тормышы өчен иң беренче чиратта ата-ана җаваплы. Транспорт төрләре көннән-көн күбәйгән заманда, кагыйдәләр дә арта.
Куркынычсызлыкны тәэмин итү максатыннан инспекторлар “Яшен” оешмасының балалар һәм башка пассажирларны йөртүче автобусларын да тикшерде.
Агымдагы елның 7 аенда Татарстанда шоферларның юл йөрү кагыйдәсен бозуы нәтиҗәсендә 59 һаләкәт теркәлә. Анда 73 кеше зыян күрә. Юлда хәрәкәт мәңгелек. Кеше гомере бер генә. Кагыйдәләрне үтәү — гомерне саклап кала.
Алия Галиуллина, Гөлназ Вахитова, Рөстәм Халилов, Татарстан яңалыклары, Саба раойны.
