Иртәгә 1 октябрьдә Бөтендөнья өлкәннәр көне декадасы старт ала. Республика Күп функцияле үзәкләрендә пенсионерлар өчен электрон документлар әйләнешенә түләүсез өйрәтү акциясе башланды. Торак коммуналь хуҗалыгы хезмәтләренә ничек түләргә яки табибка ничек язылырга? Өлкәннәр белән хәбәрчебез дә аралашып кайтты.
Фидаил Гыйззәтуллин да укый башлады. Торак-коммуналь хуҗалыгы хезмәтләренә дистанцион рәвештә түләү мөмкинлеген күптән ишеткән. Шуңа күрә, пенсионерларны электрон документ әйләнеше белән тәэмин итү буенча акциясе турында белгәч, озак уйлап тормыйча, үзәк бүлекчәсенә килгән. Монда аңа кайда керергә һәм кайда теркәлергә, барлык хезмәтләрдән файдаланырга кирәклеген аңлаттылар.
Совет районы күп функцияле Үзәгенең беренче категорияле белгече Альберт Сәлманов:«Чит ил паспортларын, машина йөртү таныклыгын алу тәртибен аңлатабыз. Россиянең Дәүләт хезмәтләре, Пенсия фонды һәм Татарстанның Дәүләт хезмәтләре порталында хисап язмасын булдырырга ярдәм итәбез.»
Болар белгечләр укытырга әзер булган юнәлешләрнең кайберләре генә. Ә аларның эш нәтиҗәсе шунда ук күренеп тора — дистәләгән пенсионеров белемнәрен арттырган. Киләчәктә үзләренә кирәкле күнекмәләрне алганнар.
Фидаил Гыйззәтуллин: «Миңа хәзер хокуклардан файдаланырга кирәк. Хәзер дәүләт хезмәтләре аша пошлинаны 30 процентка азрак түләячәгемне белдем.»
Бу хезмәтләрне мобиль кушымталар аша алу тагын да уңайлырак. Үзәк консультантлары алар белән дә аңлашырга ярдәм итәчәкләр. Иң мөһиме- кирәкле барлык документларның янда булуы.
Совет КФҮ бүлеге башлыгы Алсу Маденова:«Үзеңә хисап язмасын теркәсәң, үзеңнең паспорт һәм снилс номерын истә тотарга кирәк.»
Әлеге акция барлык күп функцияле үзәкләрдә 3 нче октябрьгә кадәр дәвам итә.
Булат Шакиев, Сергей Павлухин, Татарстан яңалыклары.
