Тинчурин театрында “Умай” феминистик лабораториясенең өченче очрашуы узды. Очрашуда безнең хәбәрчебез дә булып кайтты.
Тинчурин театрында Консерватория белән берлектә опера лабораториясе башланып китте. Лабораториянең максаты – татар телендә өч камера операсы булдыру. Беренче лабораторияне борынгыда төрки халыклар данланган хатын-кызы рухын гәүдәләндерүче «Умай» исеме бирелгән. Бу лаборатория татар хатын-кызының — мәгарифкә, тарихи үзгәрешләргә һәм бүгенге көнне кабул итү тәэсиренә багышланган.
Бу темаларны хатын-кызлар үзләре ачып бирергә тиеш. Шуңа да лабораториядә хатын-кызлар гына катнаша ала. Сәхнәгә әсәрләрне Туфан Имаметдиновның режиссерлар лабораториясендә катнашучылар куяр дип көтелә. Премьералар – апрель аенда Тинчурин театры сәхнәсендә узачак.
Татар мәдәниятендә хатын-кызның роле бик зур, әмма без бу турыда белеп бетермибез. Ә бит татарлыкның мәдәни коды ана аша тапшырыла – бездә «ана сөте белән», «ана теле» дип әйтәләр. Һәм лабораториядә тема сайлаганда да, башка берничә темалар арасыннан нәкъ менә хатын-кыз темасы алынган.
Искәндәр Гыймалтдинов, Никита Граханцев, Татарстан яңалыклары.
