Россия һәм Кыргызстан ведомство һәм төбәкләр дәрәҗәсендә элемтәләрне уңышлы рәвештә җайга сала, дип искәртте РФ Президенты Владимир Путин кыргыз коллегасы Садыр Жапаров белән очрашуда. Кыргыз балетының Казан һәм Россиянең башка шәһәрләрендә күрсәтелүен ул уңышлы мисал сыйфатында китерде. Бу хакта Кремльнең матбугат хезмәте хәбәр итә.
«Хәтер поезды», «Ал җилкәннәр» проектларын, кыргыз балет сәнгате яшь талантларының Екатеринбург, Чиләбе, Курган һәм Казан шәһәрләренә гастрольләрен аерым билгеләп үтәсем килә. Якын арада 15 укучы «Интерйорт – Кыргызстан балаларына» проекты кысаларында Россиягә киләчәк», — диде Россия дәүләте башлыгы.
11 октябрьдә X Россия-Кыргызстан төбәкара конференциясендә катнашучыларга видеомөрәҗәгатендә Путин РФ белән Кыргызстан арасындагы хезмәттәшлекне ныгытуда Татарстанның аерым роль уйнавын билгеләп үткән иде.
Бүген Путин рәсми визит белән Бишкекка килде, ул Ала-Арча резиденциясендә Жапаров белән сөйләшүләр үткәрә. Бу – РФ Президентының быел чит илгә беренче сәфәре. 13 октябрьдә ул БДБ илләре башлыклары Советы утырышында да катнашачак.
Искәртеп узабыз, 2021 елның 19 ноябрендә Татарстан Рәисе Рөстәм Миңнеханов һәм Кыргызстан Республикасы Президенты Садыр Жапаров Бишкекта узган очрашу вакытында ике республика Хөкүмәте арасында сәүдә-икътисади, фәнни-техник һәм социаль-гуманитар хезмәттәшлек турында килешүләрне гамәлгә ашыру өчен өч елга чаралар планын имзалады.
