Галиасгәр Камал исемендәге Татар дәүләт академия театрында «Әлдермештан Әлмәндәр» анимацион фильмының премьерасы, Тамашачыларга кинотасманың иҗат төркеме белән очрашу, персонажларның эксклюзив интервьюлары тәкъдим ителде. Кичәдән Фәннур Хәсәнов һәм Илдар Гәләветдинов видеоязмасы.
Галиасгәр Камал исемендәге Татар дәүләт академия театрында «Татармультфильм» иҗат берләшмәсенең яңа проекты – Туфан Миңнуллинның легендар «Әлдермештән Әлмәндәр» пьесасына нигезләнгән татар телендә олылар өчен беренче тулы метражлы анимацион фильм премьерасына багышланган кичә булып узды.
Белешмә биреп үтү урынлы булыр: Марсель Сәлимҗанов белән Туфан Миңнуллинның милли драматургия һәм театр сәнгатенең алтын фондына кергән пьесасы буенча куелган «Әлдермештән Әлмәндәр» спектакле Камал театры сәхнәсендә 1976 елдан башлап зур уңыш белән барды. Төп герой – Әлмәндәрне уйнаган актер Шәүкәт Биктимеров вафатыннан соң гына әлеге спектакльне сәхнәдән төшерәләр. Шул чакта «Татармультфильм» берләшмәсендә легендар әсәр мотивлары буенча тулы метражлы анимацион фильм ясау идеясе барлыкка килә.
1 сәгать 8 минут дәвам итүче «Әлдермештән Әлмәндәр» фильмы олылар аудиториясе өчен эшләнгән. Картина тормышка мәхәббәт, аның һәр мизгеленең кадерен белү, матур картлык һәм халык зирәклеге турында. Режиссеры – Сергей Киатров, сәнгать җитәкчесе – Марат Ганиев, композиторы – Мария Сергеева, сценаристлар – Азат Ганиев һәм Алсу Низамиева. Анимацион фильмны тавышландыруда Галиәсгәр Камал исемендәге Татар дәүләт академия театрының артистлары- Равил Шәрәфиев – Россиянең һәм Татарстанның халык артисты, Татарстанның атказанган артистлары Эмиль Талипов һәм Илнур Закиров катнашты. Проектта 18 иллюстратор һәм 26 аниматор көче белән 90 персонаж, 650 фон, 1126 күренеш ясалган.
«Әлдермештан Әлмәндәр» фильмы I Воронеж халыкара анимация фестиваленең конкурс программасына кабул ителгән. Шулай ук әлеге проектның Казан халыкара мөселман киносы кинофестивалендә катнашуы планлаштырыла. Фильмның республика кинотеатрларында прокаты фестиваль язмышы тәмамланганнан соң узачак. Фильм Татарстан Республикасы Рәисе каршындагы татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре Комиссиясе һәм «Татнефть»Ачык Акционерлык Җәмгыяте ярдәме белән ясалган.
Фәннур Хәсәнов, Илдар Гәләветдинов. Татарстан яңалыклары.
