Казанның 80 нче мәктәбендә Татарстанның халык рәссамы Мөдәрис Минһаҗевның “Төсләрдә милли хисләр” дип исемләнгән шәхси күргәзмәсе ачылды. Күргәзмәдә Татар Конгресыннан, Рәссамнар берлеге вәкилләре, сәнгать әһелләре, рәсем сәнгатен сөюче тамашачылар һәм 80 нче мәктәп балалары катнашты. Күргәзмәне хәбәрчебез Фәннур Хәсәнов тә күреп кайтты.
Мөдәрис Мөхетдин улы Минһаҗев – татар дөньясында бик билгеле шәхес. Аның һәр рәсемендә татар мотивлары чагыла. Рәссам татар халкына булган бөтен мәхәббәтен үз иҗатында күрсәтә. Ул пейзаж, портрет, натюрморт, шамаил һәм башка жанрларда иҗат итүче рәссам. Шәхси күргәзмәләре Россиянең, Татарстан һәм Башкортстанның күп шәһәрләрендә оештырылды.
Мин Мөдәрис Мөхетдин улын чын күңелемнән шушындый зур шәхси күргәзмәсен оештырганы өчен котлыйсым килә. Әлбәттә, ул зур рәссам, оештыручы. Бүген төрле жанрдагы әсәрләре куелган. Аңа зур уңышлар телим.
Мөдәрис Мөхетдин улы Минһаҗев Татарстанның Саба районы Шәмәрдән эшчеләр бистәсендә туган. Шәмәрдән урта мәктәбен, Ижауда Удмурт дәүләт университетының сәнгать-графика факультетын тәмамлый. Ижауда Удмурт транспорт идарәсенең эстетика бюросында эшли. Совет Армиясендә хезмәт итә. Арча Мәдәният йорты каршында сәнгать остаханәсе ачып, бизәү эшләрендә катнаша. Түбән Камада да Сынлы сәнгать студиясе ачып, шунда балаларны рәсем сәнгате серләренә өйрәтә. Рәссам бүген дә иҗат юлында.
Күргәзмәгә килгән кунаклар, рәссамның дуслары аны үз эшенең остасы, татар халкының асыл улы, татарның бөтен яшәяшен тулысы белән күрсәтә алган кеше буларак бәяләделәр. Картиналары шуны раслый. Мөдәррис Мөхетдин улы Минһаҗев — рәссам, педагог, Татарстанның атказанган сәнгать эшлеклесе, Татарстанның халык рәссамы. Шамил Бикчурин премиясе лауреаты. Татарстан рәссамнар берлеге әгъзасы.
Фәннур Хәсәнов, Таһир Хәсәнов Татарстан яңалыклары.
