Быелгы матбугат көне икеләтә бәйрәмгә әйләнде. Республика журналистлар берлегендә Татарстан журналистикасы һәм матбугатының ачык онлайн энциклопедиясе тәкъдим ителде. Басманың максаты киләчәк буыннарга бай рухи мирасны тапшыру. Әлеге вакыйгада журналист Ләлә Зәйнуллина катнашты.
Әлеге бәйрәмнең чишмә башында күренекле журналист, озак еллар матбугат министры Ислам Әхмәтҗановның фидакарь хезмәте тора.
Журналистиканың тарихы бай, зур. Ачык онлайн-басмада Татарстан журналистикасы тарихы, танылган матбугат вәкилләре турында язмалар, баш мөхәррирләр, совет чоры газета-журналлары, танылган дикторлар, телеоператорлар, хәзерге заман масс-медиа режиссерлары өчен дә урын бирелгән.
Энциклопедия булдыру идеясе берничә ел элек туган. Әлеге хезмәт Татарстан Фәннәр Академиясенең Татар энциклопедиясе институты белән бергә башкарыла.
Сәләт оешмасының IT үзәге җитәкчесе Илнур Мөхәммәтҗанов tatjur.ru (татжур.ру)
tatjur.ru
сайтында энциклопедиянең бүлекчәләрендә мәгълүматны ничек эзлисе икәнен аңлатты.
Презентациягә журналист-ветераннар да чакырулы иде, алар үзләрен ачык онлайн-энциклопедиядә тапты.
Энциклопедиягә бүген 386 мәкалә, 355 шәхес турында мәгълүмат кертелгән. Киләчәктә Онлайн энциклопедиянең махсус коллегиясен булдыру ниятләнә. Басма бүгенге журналистлар һәм публицистлар тормышындагы кызыклы фактлар белән даими тулыланып торачак.
Ләлә Зәйнуллина,Александр Решёткин, Татарстан яңалыклары.
