Күренекле язучы Заһид Мәхмүдигә исән чагында тапшырылып өлгермәгән «Татарстанның атказанган сәнгать эшлеклесе» мактаулы исеме аның гаиләсенә тапшырылды. Гадәти булмаган утырыштан журналист Ләлә Зәйнуллина репортажы.
Татар әдәбиятында үз урыны булган язучы Заһид Мәхмүдигә Татарстан Президенты Указы белән «Татарстанның атказанган сәнгать эшлеклесе» мактаулы исеме бирелә. Әмма язучыга пандемия сәбәпле ул исән чагында тапшырылмый кала.
Мактаулы исемнең күкрәк билгесен һәм документларын Татарстан Язучылар берлеге утырышында хатыны Рәшидә Мәхмүтова һәм балалары кабул итеп алды.
Язучы, әдипләр җыелган җирдә шигырьсез була алмый. Утырыш барышында татар поэзиясенә багышлап чыгарылган «Һәҗә» төрек журналы тәкъдим ителде. Журналда басылган кайбер шигырьләрен Фәнил Гыйләҗев, Рифат Сәлах, Лилия Гобәйдуллина укыды. Шул ук шигырьләрне Фатих Кутлу төрек телендә яңгыратты. Ул унөч татар китабын төрек телендә әзерләп чыгара. Хәзер шигырьләр дә тәрҗемә итә. Журналда татар шигъриятенең үткәне, бүгенгесе һәм киләчәге турында Ркаил Зәйдулла белән саллы әңгәмә дә урнаштырылган.
Шулай ук Татарстан Язучылар берлеге идарәсе өч язучыны күпчелек тавыш белән үз сафларына кабул итте.
Язучылар соңгы елларда әдәби тәнкыйть юнәлешенең аксавын билгеләде. Берлеккә яңадан өч язучыны күпчелек тавыш белән кабул итү әле өлкәгә яңалык алып килми калмас.
Ләлә Зәйнуллина, Ирек Хәмидуллин, Татарстан яңалыклары.
