Чыгарылышны кайгылы хәбәр белән дәвам итәбез.
Күренекле, Татарстан радиосы ветераны Мәрьям Арсланова 97 нче яшендә вафат булды. Ул радиода утыз ел чамасы эшләде. Кабатланмас, үзенчәлекле тембрлы, күкрәк тавышлы диктор халык мәхәббәтен яулады, аның осталыгын бөек диктор Юрий Левитан да югары бәяләгән иде.
Күренекле радио дикторы, Татарстанның атказанган мәдәният хезмәткәре Мәрьям Ислам кызы Арсланова бай мирас калдырды. Бик күпләр Мәрьям ханымның Галиасгар Камал исемендәге татар дәүләт академия театрында эшләгән, аннары Казан мәктәпләрендә мөгаллимлек иткән елларын сагынып искә ала. Шулай да аның талантының чын мәгънәсендә балкып, ачылып киткән чоры Татарстан радиосында хезмәт куйган вакытка туры килә. Шушы елларда ул, тормыш юлдашы, күренекле нәфис сүз остасы Айрат ага Арсланов белән иңгә-иң торып, татар теленең саф, камил эталонын булдырды, радиода дикторлык мәктәбен үстерүчеләрнең берсе булды.
Хәзерге вакытта радио фондында Мәрьям Арсланова алып барган тапшырулар, әдәби-музыкаль программалар, радиоспектакльләр саклана. Алар киләчәктә дә эфир киңлекләрен бизәп торыр, халыкка игелекле хезмәтен калдырып киткән шәхеснең исеме онытылмас.
Мәрхүмәне соңгы юлга озату мәрәсименә элеккеге хезмәттәшләре, иҗатын сөючеләр килгән иде. Мәрьям Ислам кызы изге Рамазан аенда бакыйлыкка күчте, урыны Оҗмахта булын, дип телик.
Алия Галиуллина, Ринат Сәхипгәрәев, Татарстан яңалыклары.
