Татарстан Республикасының Рәшит Ваһапов исемендәге татар мәдәнияте иҗтимагый фонды, милли моңны саклап, татар җыры сәнгатендә яңа офыклар ачуны дәвам итә. Әлеге максаттан оештырылган «Яңа татар җыры» конкурсының быел икенчесе игълан ителгән иде. Шушы көннәрдә жюри әгъзалары онлайн һәм офлайн форматларда җыр сайлау белән шөгыльләнә. Өр-яңа җырларны хәбәрчебез Мөршидә Җиһан да тыңлады.
Конкурска күчкәнче лирик чигенеш ясап алыйк. Кайчагында җырның җыртыгы юк дип мәзәкләсәк тә чынбарлыкта сипли алмаслык җыртык җырлар да бар. Идрис Газиев фикеренчә, татар эстрада җырларында һаман бер үк тема кабатлана.
Алар арасында авыл да бар әле. Татарстанның һәр авылына диярлек, кайберләренә хәтта икешәр җыр багышланган. Ә тәҗрибәле продюсер Рифат Фәттахов тема мәсәләсен менә ничек аңлата.
Хакыйкать бәхәстә туа дигәндәй, бәя дә чагыштырмача бирелә. Әйтик, татар җырына тагын кайсы халык мөкиббән?
Оештыруны Казанда җыр яздыру студиясен төзетүдән башларга кирәк дип исәпли Рөстәм Сәрвәров. Хәтта, Мәскәү җырчылары да монда килеп яздырырлык булсын.
Мәдәният һәм сәнгать белгечләре фикеренчә, татар эстрадасында белем, зәвык җитенкерәмәгән җырчылар шактый.
Үсәр һәм үстерер өчен Казанда мөмкинлекләр тудырырга тырышалар. Татарстан Президенты Рөстәм Миңнеханов ярдәме белән үткәрелгән җыр сәнгатен үстерүгә багышланган проектлар берничә. Яңа татар җыры конкурсы шуларның берсе. Тагын бер ачыклык кертеп үтик, жюри әгъзалары җырчыга түгел, ә җыр сүзләре һәм көй язучыга бәя бирә.
Узган ел нәтиҗәләре буенча беренче урынга “Татар алга!” җыры лаек булган иде. Ә быелгысына әле нәтиҗә ясарга иртәрәк ди төп оештыручы.
“Яңа татар җыры” конкурсының гомуми приз фонды — 2.000.000 сум! Жюри ике номинациядә: – «Иң яхшы татар җыры», һәм «Иң яхшы балалар җырын сайлый.
Мөршидә Җиһан, Таһир Хәсәнов. Татарстан яңалыклары.
