Һәр заманның үз геройлары, үз идеяләре бар дип сөйләргә яратабыз. Ләкин кешелеклелек, фидакарьлек, игелекле булу кебек кыйммәтләр буыннан-буынга күчеп, сакланырга тиеш.“Күркәм эшләр эзеннән” дигән яңа сәхифә — әнә шундый сыйфатларга ия кешеләр турында. Бүгенге героебыз — Лаеш районының Олы Кабан авылында яшәүче Хәмит Хәлиуллин. Сүзне хезмәттәшем Ания Гыйбадуллинага бирәм.
Казан тирәсендәге бистә-авылларга хас булганча, соңгы елларда Олы Кабан авылы да үсә, яңа йортлар салына, инфраструктурасы яхшыра. Төзелеп килә торган урамнарның берсе безнең бүгенге героебыз исемен йөртә. Замандашыбыз Хәмит Минһаҗ улы Хәлиуллин халык мәхәббәтенә ничек ирешкән соң?
Танышуыбызны Хәмит абыйның йорты каршындагы күл янында башладык. Аның тырышлыгы белән күл авыл халкының яраткан ял урынына әйләнгән. Элек биредә сазлык булган, хәзер җәйләрен — балыклы күл, ә һәр кыш башында шугалак ясала. Тирә-як балалар тавышларыннан гөрләп тора. Иң зур шатлык, шул инде ди Хәмит Халиуллин.
Хәмит абыйның бөтен кирәкле транспорты, кораллары үзендә: тракторын кабызып карын эттерә, җир казый, күтәртә, ташый. Аның тирәсенә үзе кебек үк битараф булмаган кешеләр җыелган. Без килгәндә дә күрешләр бергәләп шугалактан кар чистарта иде.
Яшьләр дә читтә калмый. Эмиль Галимуллин авыл халкының тормышын яхшырту өчен башкарылган эшләргә бик теләп катнаша.
Хәмит Хәлиуллин тумышы белән Кама Тамагы районыннан, аннары гаиләсе Югары Ослан районының Бөрек авылына күчеп килә. 3 ел хәрби-диңгез флотында элемтәче булып хезмәт итә. Армиядән соң язмыш аны Казахстан якларына алып китә. 30 ел элемтә өлкәсендә эшли, СССРның мактаулы радисты була. Олы кабанлылар бәхетенәдер инде, 1994 елда Хәмит Хәлиуллин гаиләсе беләнЛаеш районының бу авылына килеп урнаша.
Сүз уңаеннан, Олы Кабан авылына Казан ханлыгы чорында нигез салынган. Башта ук анда руслар төпләнеп яшәгән, биредә урнашкан Спас-Преображения чиркәве, мәсәлән, тарих һәм мәдәният һәйкәле булып тора.
Ә менә Кабан авылындагы беренче мәчет барлыкка килүендә безнең героебызның өлеше зур булган. Башта ул мәчетне Зур Кабанда төзергә планлаштыра, ләкин кайбер сәбәпләр аркасында Аллаһ йорты Кече Кабанда барлыкка килә.
Теләсә кайсы эш, якын кешеләрең хуплаганда гына, уңышка китерә. 46 ел буе бергә гомер иткән Рәдифә апа иренең авылдашлары өчен җан атып торуы белән горурланып сөйләде.Әнә шулай, яраткан тормыш иптәше, балалары һәм оныклары янәшәсендә тормыш итә Хәмит абый. Янында фикердәшләре, үзе кебек үк ярдәмчел авылдашлары бар. Тормыш рәвешеннән канәгать булып, башкарган эшләре өчен оялмыйча, горур яши ул. Мөгаен, башкалардан ишеткән рәхмәт сүзләре аның тормышына шундый тирән мәгънә, ә йөзләренә нур өстидер.
Быелгы Яңа елны алар кабат тәрәзәләреннән үзләре ясаган күлгә сокланып, балаларның шат тавышларын, канәгать йөзләрен күреп каршы алачаклар. Киләчәктә дә рәхмәт сүзләре ишетеп яшәргә язсын!
Ания Гыйбадуллина, Ринат Сәхибгәрәев, Татарстан яңалыклары, Лаеш районы.
