Яңалыклар чыгарылышын «Күркәм эшләр эзеннән» сәхифәсе белән дәвам итәбез. Чираттагы репортажны Әлмәт районыннан әзерләдек. Бу көннәрдә әлмәтлеләр Украинадагы хәрби операциядә катнашучы ватандашларыбызга чираттагы гуманитар ярдәм озатты. Бүгенге сәхифәдә сүз — хәрбиләребезгә ярдәм чараларын оештыручылар турында.
Ярдәм итәргә әзер булу, кешелеклелек һәм тугрылык кебек сыйфатлар авыр вакытларда сынала. Республикабызның бер генә кешесе дә Украинада барган махсус хәрби операциягә бәйле килеп туган вәзгыятькә битараф кала алмагандыр. Ярдәм итәргә теләк кирәк, чарасын табып була.
Без юл тоткан Әлмәт районы – Украинадагы хәрби операция вакытында ярдәм чараларын баштан ук иң югары дәрәҗәдә оештырган районнарның берсе. Гуманитар йөк җыйганда хәрби җитәкчелек җибәргән исемлек нигез итеп алына. Нәкъ менә ихтыяҗ булган әйберләр әзерләнә. Бүгенге көнгә Әлмәттән 3 зур гуманитар ярдәм ияләренә барып җиткән. Исемле посылкаларны да хәрбинең кулына тапшырырга тырышалар.
Без баштан ук дөрес итеп эшне оештыра алдык, шәһәрдә штаб булдырылды, аңа иң белемле һәм тәҗрибәле кешеләр кертелде. Һәрберсе алдына төгәл бурычлар куелды. Миңа мобилизацияләнгәннәр өчен гуманитар ярдәм җыю эше йөкләнде. Төп максат, әлбәттә, гуманитар йөк туплау өчен акчалар табу.
Әлбәттә, ярдәмнең төрле юлларын эзлиләр. Кышкы суыкларда җылы киемнәргә ихтыяҗ аеруча зур.
Яшьләр арасында волонтерлык хәрәкәтенә кушылучылар күп. Шулай итеп, тиз генә эшкә дә өйрәнәләр һәм ватанпәрвәрлек тә купшы сүз генә булмавы аңлашыла.
Күркәм эшләр эзләре безне Әлмәт шәһәреннән ерак түгел урнашкан Миңлебай авылына китерде. Җирлекнең башкарма комитеты бинасында хәрбиләребезгә яшеренү өчен маскировка ятьмәләре үрәләр.
Мобилизацияләнгәннәрне күпләп җибәрә башлаганнан соң һәрберебез ничек ярдәм итә алуы турында уйлангандыр. Уртак эшкә кушылу чараларын эзгәндер. Мин үзем бәйли дә, тегә дә белмим. Егетләргә ничек булышыйм икән дип озак уйландым һәм менә интернетта маскировка өчен сеткалар ясау турында мәгълүматларга тап булдым.
2022 ел азагында Татарстан Президенты Рөстәм Миңнеханов, гадәттәгечә, Республикабызның иң лаеклы кешеләренә дәүләт бүләкләре тапшырды. Тантанада билгеләнеп үтүчеләр арасында Миңлебайдан Дамир Батталов бар иде. Бүгенге героебыз өчен Туган җир, хәрби хезмәт һәм намус дигән төшенчәләр беренче урында.
Килеп туган вәзгыятьтән канәгать булмаска, тәнкыйтьләргә мөмкин. Шул ук вакытта хәлне уңай якка үзгәртү өчен тырышырга, уртак эшкә булдыра алганча үз өлешеңне кертергә мөмкин. Бу, әлбәттә, авыррак. Безнең бүгенге геройларыбыз шундый — катлаулырак, ләкин барыбыз өчен дә кирәкрәк юл сайлаган кешеләр…
Ания Гыйбадуллина, Ренат Сәхипгәрәев, Кадрия Мерсипова. Татарстан яңалыклары.
