Нәкый Исәнбәт Татарстанның халык язучысы, драматург, шагыйрь, татар дөньясына саллы өлеш кертүче һәм якты эз калдырган шәхес. Шул уңайдан Кәрим Тинчурин театрында “Җыен” фонды тарафыннан “Татнефть» компаниясе ярдәмендә нәшер ителгән күренекле галим,“Идегәй” дастанын беренче булып бастырып чыгаручы Нәкый Исәнбәткә багышланган китапны тәкъдим итүгә – “Син сазыңны уйнадың” чарасы уздырылды. Китапны басмага филология фәннәре кандидаты Миләүшә Хәбетдинова әзерләгән. Тулырак алдагы сюжетта.
Нәкый Исәнбәт җир йөзендә 93 ел гомер итеп, халкыбызга биниһая зур мирас калдырып, фәндә, әдәбиятта, сәнгатьтә чын мәгънәсендә Исәнбәт мәктәбен булдырган шәхес.
Нәкый Исәнбәт “Идегәй” дастанын халыктан җыеп, эшкәртү эшен 1930 елларда ук башлый һәм 1940 елда бастырып чыгара. Исәнбәт “Идегәй” дастанын бастырып чыгарып, данлана да, хурлана да, кагыла да. Иң мөһиме – дастан яңадан халыкка кайта.
К.Тинчурин театры баш режиссеры Туфан Имаметдинов “Идегәй” дастанын куярга ниятли,. Чөнки әсәр тарихи, әдәби яктан бүген аеруча әһәмияткә ия.
Нәкый Исәнбәт иҗатының башында ук дөньяны үзгәртәм дип максат куйган. Бүген Исәнбәт традицияләрен Татарстанның халык шагыйре, Тукай бүләге иясе, китапның җаваплы мөхәррире Разил Исмәгыйль улы Вәлиев дәвам итә.
Күренекле шагыйрьнең иҗатына берәү дә битараф түгел. Татарстанның һәм Россиянең халык артисты Әзһәр Шакиров атаклы шәхескә багышлап рәхмәт сүзләрен җиткерде
Нәкый Исәнбәт – классикларның классигы.. Ул төрки әдәбият белән танышып барган, дөнья классикларының әсәрләрен татарчага күчергән. Күп кенә әсәрләрне рус теленнән татар теленә тәрҗемә иткән. Әлеге чарада Шекспирның “Гамлет” әсәренең татарчасын да ишетергә мөмкинлек туды.
Нәкый Исәнбәтнең хатыны Наҗибә ханым “Мин аның гомерен татар милләте хакына озайтырга тиеш!” дигән сүзләрне еш кабатлый торган булган. Гомумән, Исәнбәтнең гаиләсе, туганнары аның иҗатында һәрвакыт терәк булган.
Китап бәйрәме Тинчурин театрында 26-27 гыйнвар көннәрендә премьерасы булачак “Идегәй” татар халык дастаны буенча куелган спектакльгә багышлана.
Динә Нәҗметдинова, Ирек Хәмидуллин. Татарстан яңалыклары.
