Бу көннәрдә Татарстанның фольклор музыкасы дәүләт ансамбленең сәнгать җитәкчесе, Россиянең атказанган, Татарстанның халык артисты, Айдар Фәйзрахмановның «Юлын белгән арымас» дип исемләнгән китабы дөнья күрде. Әлеге китапта Айдар Фәйзрахмановның якыннары, замандашлары, сәхнәдәшләре, балачагы, туган ягы турында язылган җылы хатирәләре урын алган. Китапны тәкдим итү чарасыннан Динә Нәҗиетдинова репортажы.
Айдар Фәйзрахманов үзенең иҗаты аша танылган шәхес. Булачак музыкант, дирижер 1955 нче елның 30 гыйнварында Арча районы Урта Бирәзә авылында алтынчы бала булып дөньяга аваз сала. Кечкенәдән үк җаны-тәне белән музыкага, иҗатка гашыйк була Айдар абый. Барлык хыялларын чынга ашарыр өчен Казан дәүләт консерваториясенең вокал факультетын тәмамлый. Башта Муса Җәлил исемендәге Татар дәүләт опера һәм балет театрында солист булса, аннары Татарстан дәүләт фольклор музыкасы ансамбленең сәнгать җитәкчесе вазыйфасын башкара.
Айдар Фәйзрахманов халык җырларын башкаручы буларак танылу ала. Композиторлар Сара Садыйкова, Рөстәм Яхин, кебек шәхесләрнең җырларын үзенең репертуарына кертә.
Бүгенге көндә китаплар нәшер итә. Россиянең атказанган, Татарстанның халык артисты Айдар Фәйзрахмановның «Юлын белгән арымас» дип аталган китабы дөнья күрде. Әлеге китапта бөек шәхеснең тормыш юлы энәсеннән алып җебенә кадәр язылган, балаларының һәм оныкларының фотоларына кадәр урнаштырылган, ә аеруча зур игътибар дәүләт фольклор музыкасы ансамбленә бирелгән. Айдар абыйның әнисенә язган хатлары шулай ук китапта мөхим урын алып тора. Музыка сөючеләр өчен төрле җырларның сүзләре һәм ноталары бирелгән.
Канат куючы, файдалы кинәш бирүчеләрнең берсе Айдар Фәйзрахмановның Фәрдия апасы булып тора
Айдар абыйның киләчәккә планнары зурдан, халыкны һәм тамашачыны тагын да кызыклырак проектлар белән куандырасы һәм шаккатырасы килә аның. Мемуарлар язырга да ниятли.
Динә Нәҗметдинова, Ирек Хәмидуллин.
