Татарстанда «Үз якташың өчен тавыш бир» исеме белән республиканың күренекле шәхесләре өчен тавыш бирү дәвам итә. ТАССР оешуга 100 ел тулуга багышланган рәсми сайтта 45 кандидатның берсе өчен тавыш бирергә мөмкин. Үз тавышыгызны сайтта 29 февральгә кадәр бирергә калырга ашыгыгыз. Күренекле шәхесләр арасында шагыйрьләр, спортчылар, галимнәр, сәясәтчеләр, рәссамнар, Ватанны саклаучылар, музыкантлар, җәмәгать эшлеклеләре бар. Әйтик, Буа районында яшәүчеләр, СССР Авиация сәнәгате министры булган Петр Васильевич Дементьев өчен тавыш бирә ала. Ике тапкыр Советлар Союзы Социалистик Хезмәт Герое, тугыз тапкыр Ленин ордены белән бүләкләнгән шәхеснең туган төбәгеннән хәбәрчебез Ранис Әмәтшин репортажы.
Анастасия Сердцева һәм Мария Куракиналар Уби мәктәбендә белем алалар. Уку белән бергә сәнгатьне дә үз иткәннәр. Мәктәптәге вокаль инстументаль ансамбльгә йөриләр. Буш вакытларында якташлары Петр Дементьев хөрмәтенә оештырылган музейда да еш булалар.
Анастасия Сердцева: “ Петр Дементьев- бик зур шәхес. Ул безнең якташыбыз, горурлыгыбыз. Аның хөрмәтенә бездә урам исемнәре аталган, зур агрофирма аның исемен йөртә. Шулай ук без укый торган мәктәпкә 2017елда аның исеме бирелде”
СССР Авиация сәнәгате министры, ике тапкыр Советлар Союзы Социалистик Хезмәт Герое, тугыз тапкыр Ленин ордены белән бүләкләнгән авиация промышленносты министры Петр Васильевич Дементьевның туган төбәгендә зур гына музей эшләп килә.
Петр Дементьев Буа өязе Алешкин Саплык авылында укытучылар гаиләсендә дөньяга килә. Әтиләре беренче бөтендөнья сугышыннан соң авылдагы надалыкны бетерү буенча чиркәү каршында мәктәп оештыра. Шунда ук 3 баласы белем ала.
Туган нигезендә булдырылган музей-йортта бүген укучылар белән дәресләр алып барыла. 43 ел тарих фәнненән белем биргән остаз Алескей Макаров та биредә еш кунак була. Герой якташы хакында берничә китап авторы да ул.
Алексей Макаров:”Миңа бу китапны язарга Петер Дементеьевның туу тарихындагы икеләнүләр этәрде. Күп кенә документларда ул Уби авылында туган дисәләр дә, чынлыкта Ул Алешкин Саплык авылында дөньяга килә. Бу хакта архивларда сакланган метрикәләрдә күренә. Ул вакытта Чүпрәле районы Буа өязенә караган”
Петр Дементьев илнең авиация промышленностен булдырган, сугыш вакытында самолет җитештерә торган заводларның эвакуациясе өчен җаваплы шәхес. Гомумән, аның җитәкчелегендә илнең авиация промышленносте сафка баса. Петр Дементьев министр булган чорда елына 500 самолёт җитештерелгәнлеге билгеле. ТАССРның 100 еллыгына багышлап “100.Татарстан ру сайтында” “Якташың өчен тавыш бир!” дип аталган конкурс бара. Анда республиканың легендар шәхесләре өчен тавыш биреп була.
Ранис Әхмәтшин,Сирин Хәсәнов.
