Узган ялларда Теләче районы Урта Мишә авылында бәйрәм узды. ТАССРның 100, Бөек Җиңүнең 75 еллыгы уңаеннан авыл үзәгендә батырлар истәлегенә һәйкәл ачылды. Тантанадан безнең хәбәрчеләребез әзерләгән репортаж.
Бөек Җиңү көне – ата-бабаларыбызның намус яктысы, керсез иманы белән нурланган, күпсанлы корбаннарның өзелеп калган тормыш җыры белән бизәлгән. Җиңүне безгә бүләк иткән мәрхүм солдатлар да, аксакал ветераннар да, сугыш ятимнәре дә, тыл хезмәтчәннәре дә онытылмый – онытырга хакыбыз юк. Сугыш дигән ачы хәсрәт Теләче районы Урта Мишә авылында һәр өйгә ишек кага. Авылның 120 батыр улы Ватанны сакларга дип дошман белән көрәшкә утка керә. Җиңү көнен батыр уллары, ирләре, әтиләре белән каршы алу бәхете бик аз гаиләгә генә насыйп була.
Бүген авылда сөенечле вакыйга. Бөек Җиңүнең 75 еллыгында Урта Мишә авылы каһарманнарының исемнәре мәңгеләштерелде. Алар истәлегенә авылның нәкъ үзәгендә һәйкәл ачылды.
Батырлар данын олылап, авыл халкына зур сөенеч бүләк иткән өчен Теләче районы башлыгы Нәҗип Хаҗипов иганәче Ринат Мифтаховка рәхмәт хаты тапшырды.
Авылда Һәйкәл булдыру идеясе белән йөргәндә, Ринат Рамил улы һәр йортның тарихы белән үзе якыннан таныша. Чыгышында ул һәр авылдашын искә алды.
Хәтер – ул мәңгелек. Теләче районы Урта Мишә авылында да бөек җиңүне бүләк итүчеләрнең исемнәре алтын хәрефләр язылды, мәңгелеккә уелды.
