Татарстан Милли музеена 125 ел тулды. Ул Россиядәге иң эре төбәк музейларының берсе. Шунлыктан, бу дата Татарстанның милли һәм мәдәни тормышы өчен бик зур әһәмияткә ия. 1895 елда ачылган музей зур үсеш юлы үтә — Казан шәһәренең фәнни-сәнәгать музееннан алып, Татарстанның Милли музее дәрәҗәсенә үсеп, республикабызның милли брендына әверелде.
Музейны оештыручылар арасында Казан университетының күренекле галимнәре, шәһәр җитәкчеләре, хәйриячеләр бар. Аның нигезен галим, коллекционер Андрей Лихачёв тупланмалары, 1890 нчы елгы фәнни-сәнәгать күргәзмә экспонатлары тәшкил итә. Төрле дәвердә эшләгән музей хезмәткәрләре ярдәмендә 940 меңнән артык экспонаттан торган кабатланмас коллекцияләр тупланган. Алар республикабызда яшәүчеләрне һәм килгән кунакларны Татарстанның табигый һәм мәдәни-тарихи үсеше, Көнчыгыш һәм Көнбатыш традицияләренең үзара яраклашуы, борынгыдан килгән дөнья цивилизациясе белән таныштыра. Музейда республикабызның тиңдәшсез милли байлыгы саклана. Ул матди һәм рухи мирасны яшь буынга тапшыруда, мәгариф, фәнне, милли традицияләрне дәвам итүдә, Татарстанның тарихы, уңышлары белән таныштыруда зур эш башкара. Хәзер ТАССРның 100 еллыгын бәйрәм итүгә багышланган экспозиция төзелә. Коллекцияләрне күрсәтү, музейга килүчеләрне Фонд һәм реставрация эшләре үзенчәлекләре белән таныштыру өчен «Ачык фондлар» булдырыла.
Музей -белем бирү проектлары һәм программалары – «Татарстан музейлары язы», фестивальләр, фольклор бәйрәмнәре, конкурслар аша төбәкнең мәдәни мохитен формалаштыруга йогынты ясый.
